विपिनको केसमा यसरी चुक्यो सरकार
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
इजरायलबाट हमासले बन्धक बनाएर गाजा लगेका २ सय ४० जनामध्ये ६९ जना चार दिनमा छुटिसक्दा नेपालका विपिन जोशीको अत्तोपत्तो छैन । विपिन हमासको नियन्त्रणबाट कहिले छुट्छन्, अहिलेसम्म प्रस्ट हुन सकेको छैन । विपिनको अहिलेको अवस्थाबारे पनि थाहा छैन ।
![](https://assets-cdn.ekantipur.com/uploads/source/ads/comp-900x100-1672024010950.gif)
इजरायल सरकारले भने विपिन हमासको कब्जामा रहेको जनाएको छ । हमासले इजरायलीका साथै थाइल्यान्ड, फिलिपिन्सलगायत मुलुकका नागरिकलाई छाड्दा विपिन किन छुट्न सकेनन् ? नेपाल सरकारको कूटनीतिक पहल कहाँ पुगेन ? सरकार कहाँ चुक्यो ? अहिलेका यक्ष प्रश्न हुन् यी ।
विपिनका सन्दर्भमा नेपाल सरकार नराम्रोसँग चुकेको छ । हमास–इजराइल युद्धमा हमासविरुद्ध नेपाल सरकारले हत्त न पत्त विज्ञप्ति जारी गर्नु गल्ती भएको छ । आफ्नो नागरिक नछुटाईकनै किन जारी गर्नुपर्यो हमासविरुद्ध विज्ञप्ति ?
प्रचण्ड सरकारले यो प्रश्नको उत्तर दिनुपर्छ । थाइल्यान्ड सरकारले हमासलाई चिढ्याउने कार्य गरेको थिएन । त्यसैले थाई नागरिक हमासको नियन्त्रणबाट मुक्त भए । नेपाल सरकारले भने आफ्नो एक नागरिकलाई पनि छुटाउन सकेको छैन ।
नेपाल सरकारले यस्तै भूल रुस–युक्रेन युद्धमा पनि गरेको थियो । नेपालले युद्ध सुरु भएलगत्तै रुसको विरोधमा विज्ञप्ति जारी गरेको थियो जबकि भारतले दुवै पक्षलाई चिढ्याउने काम गरेन । उल्टो रुसलाई फकाएर ठूलो मात्रामा सस्तो मूल्यमा इन्धन किनेर लाभ लियो । सरकार किन कूटनीतिमा चुकिरहेको छ ?
अब यसबारे सर्वदलीय बैठकमा गम्भीर बहस हुनुपर्यो ताकि आगामी दिनमा नेपालको कमजोरी प्रदर्शन नहोस् । अहिलेलाई विपिन जोशीको रिहाइको पहलमा सफलता मिलोस् ।
– गोपाल देवकोटा, जोरपाटी, काठमाडौं
![](https://assets-cdn.ekantipur.com/uploads/source/ads/900-x-100-1-0282024055738.gif)