विद्वान्हरूको जमघटबाट मुलुकको प्रसिद्धि

लुम्बिनी सरकारले आउँदो २८ र २९ गते आयोजना गर्न लागेको उक्त सम्मेलनमा विश्वका मूर्धन्य व्यक्तित्व सामेल हुने भएकाले यसबाट बुद्धको जन्मस्थलको मात्र नभई लुम्बिनी प्रदेश एवं मुलुकको गरिमा बढ्ने विषयमा दुईमत रहँदैन ।

१० जना नोबेल पुरस्कार विजेताले सम्मेलनमा सहभागिताको प्रतिबद्धता जनाउनुका साथै विश्वका उच्च तहका नेतासमेत सामेल हुने भएपछि यसको चर्चा विश्वव्यापी हुने देखिन्छ ।

सहभागी हुने चर्चित नेता, व्यक्तिमध्ये भारतका पूर्वराष्ट्रपति रामनाथ कोविन्दका साथै स्विडेनका पूर्वप्रधानमन्त्री, दक्षिण सुडानका पूर्वराष्ट्रपति, अन्तर्राष्ट्रिय कानुन बनाउने ब्राजिलका न्यायाधीश, जोर्डनका युवराजलगायत छन् ।

अन्य अति विशिष्ट व्यक्ति, लगानी गर्न सक्नेहरू, धनाढ्य फाउन्डेसनका व्यक्तिलाई आमन्त्रण गरिएकाले यसबाट सम्मेलनको महत्त्व बढ्ने, प्रतिभावान्, बहुआयमिक व्यक्तित्वबाट लुम्बिनीको विकासमा नयाँ अवधारणा आउने देखिन्छ ।

बालबालिका, शान्ति र विकासमा सम्मेलन केन्द्रित रहने, सहभागीलाई बर्दिया राष्ट्रिय निकुञ्ज, स्वर्गद्वारी, पाल्पाको हिल स्टेसन पनि लैजाने कार्यक्रम रहेकाले त्यसको प्रचारप्रचारबाट पर्यटन प्रवर्द्धनमा नया आयाम थपिने निश्चित छ । तथापि यतिबेला लुम्बिनी परिसरको कमी कमजोरी गनेर साध्य छैन । उक्त क्षेत्र मदिरामय बनेको देखिन्छ ।

ध्यानमा संलग्न हुन आउने विदेशीहरू त्यहाँको कुव्यवस्था देखेर तत्कालै फर्कने गरेको यथार्थ जगजाहेर छ । लुम्बिनी क्षेत्रको इतिहास, पौराणिकता झल्काउने, बुद्धको जीवनी, बुद्धत्व एवं निर्वाणप्राप्तिसँग जोडिएका गतिविधि समेटेर एउटा बृहत्तर म्युजियम स्थापना गर्नुपर्ने आवश्यक देखिन्छ ।

दुःखको कुरा खुराफाती राजनीतिक गतिविधि, निर्वाचनको कुरामा हामी महिनौं अघिदेखि गफ, छलफल गरेर समय बिताउछौं तर पहिलोपटक नोबेल पुरस्कार विजेतादेखि विश्वचर्चित व्यक्तित्वसम्मको जमघटलाई नजरअन्दाज गरिरहेका छौं ।

वस्तुतः संघीय सरकारसमेतको संलग्नताबाट उक्त शिखर सम्मेलनलाई राष्ट्रिय गौरवको कार्यक्रम बनाएर प्रचारप्रसारलाई उचाइमा पुर्‍याउनुपर्छ, विद्वान्हरूको सल्लाह, सुझाव समेटेर लुम्बिनी क्षेत्रलाई अद्वितीय पर्यटकीय गन्तव्य बनाउनुपर्छ ।
– भुवनेश्वर शर्मा, चन्द्रागिरि–२, काठमाडौं