रुस–युक्रेन युद्ध र मानवता

युद्धले कसैलाई पनि फाइदा हुँदैन । युद्धमा सबै पराजित हुन्छन् । कसैको जित हुँदैन । युद्ध भनेको यस्तो अवस्था हो, त्यो जो केहीले होस् भन्ने चाहना राख्दैन । त्यसमाथि पनि युद्धले दिने पीडा यति निर्मम र बर्बरतापूर्ण हुन्छ कि कसैले कल्पनासम्म पनि गर्न सक्दैन ।

विश्वको जुनसुकै देशमा युद्ध किन नहोस्, त्यसको बाछिटाले संसारलाई र विश्वभर भएका सबैलाई प्रभाव पार्छ ।

विश्वका साना र गरिब देशमा नागरिकले दुई छाक राम्रोसँग खान पाएका छैनन् तर युद्धका नाममा हातहतियार खरिदमा मात्रै अर्बौं डलर खर्च भइरहेको छ । आखिर कहिलेसम्म मानवजातिले आफ्नो स्वार्थका लागि एकअर्को देशसँग लडेर मानवताको धज्जी उडाउँदै युद्ध लड्ने ?

रुस–युक्रेन युद्धको मारमा ती दुई देशका नागरिकले मात्र दुःख भोग्नुपरेको छैन । शक्तिशाली देशहरूको लडाइँको चपेटामा आम नागरिकले कहिलेसम्म दुःख र कष्ट भोग्नुपर्ने हो ?
– भगवान पुडासैनी, जोरपाटी, काठमाडौं