ओलीको बोली

नक्कली भुटानी शरणार्थी प्रकरणका बारेमा संसद्मा आफूले छताछुल्ल पार्ने कुरा ओलीले केही दिनअघि नै सार्वजनिक गरिसकेका थिए । यसर्थ उनको सम्बोधनप्रति आम नागरिकको अपेक्षा वर्तमान राजनीतिक परिवेशको भन्दा छुट्टै रहेको थियो । तर ओलीले सिङ्गो समाजलाई नै ढाँटे ।

उनले आफ्नो करिब दुईघण्टे भाषणमा भुटानी शरणार्थीका बारेमा गुह्य कुरा खोल्नु त कताकता उल्टै यो प्रक्रिया आफूले धेरै पहिलेदेखि नै थाहा पाएको घुमाउरो जानकारी दिए । आफ्नो नेतृत्वको सरकारका बेलामा यसबारेमा केकस्ता समिति बने त्यसको कुनै जानकारी आफूलाई नभएको समेत ओलीले संसद्मा जानकारी गराए ।

मिडियामा आएका कुरा सत्य हुन् भने उनकै नेतृत्वको सरकारमा गृहमन्त्री रहेका रामबहादुर थापाले नै बालकृष्ण पन्थीको नेतृत्वमा भुटानी शरणार्थी प्रकरणसम्बन्धी छानबिन गर्नका लागि मन्त्रीस्तरीय बैठकबाट त्यस्तो समिति गठन गरेका हुन् । तर ओलीको भनाइलाई आधार मान्ने हो भने त्यो कुरा झुटो हो । ओलीले सम्बोधनका क्रममा नक्कली भुटानी शरणार्थीका बारेमा बोलेका विषय करिब यति नै थिए ।

यसर्थ ओलीको भाषण सुनेर त्यसमा समर्थन गर्नलायक कुनै कुरा पनि भेटिएन, बरु उनले जुन विषयमा प्रस्तुत हुन्छु भनेका थिए । त्यो विषयमा यथेष्ट समय नदिएकामा उनको सम्बोधनको विरोध गर्नलायक देखिए ।

ओलीले सम्बोधनका क्रममा अधिकांश समय सरकारले गएको ५ गते ल्याएको नीति तथा कार्यक्रमको विरोधमा खर्चिए । उनले जसरी सरकारले ल्याएको नीति तथा कार्यक्रममा एउटा बुँदालाई अर्को बुँदाले खण्डन गरेको आरोप लगाएका थिए । त्यसै गरी आफूले गरेको सम्बोधनका क्रममा पनि त्यही प्रक्रिया दोहोर्‍याए ।

उनले कतै सरकारको नीति तथा कार्यक्रमलाई आफ्नो नेतृत्वले सरकाले ल्याएको नीति तथा कार्यक्रमको कपी भनेका छन् भने कतै त्यसको आक्रोशात्मक आलोचना गरेका छन् । यदि आफ्नै पालाको सरकारको नीति तथा कार्यक्रमको कपी भएको भए त्यसको विरोध गर्नु भनेको तत्कालीन आफ्नै सरकारले ल्याएको नीति कार्यक्रमको विरोध गरेको देखिन्छ ।

यदि त्यसो हो भने उनले सरकारमा हुँदा आफूले गरेका कामलाई नै त्यो सत्तामा रहुन्जेल मात्र ठीक थियो, अहिले त्यो सबै गलत छ भनेर प्रमाणित गर्नुपर्छ । होइन भने एउटै काम सत्तामा हुँदा ठीक र सत्ताबाहिर हुँदा बेठीक देख्ने प्रवृत्तिलाई तिलाञ्जली दिन सक्नुपर्छ ।

बरु उसले आफ्नो नेतृत्वको सरकारले ल्याएको नीति तथा कार्यक्रम थियो भने वर्तमान सरकारलाई बधाई पो दिनुपर्थ्यो तर उनले कपी पनि भन्ने र विरोध पनि गर्ने दोहोरो चरित्र देखाएर उनको मानसिक अवस्थामा नै प्रश्न गर्नुपर्ने ठाउँ पो खडा गरिदिएका छन् ।
– सुजन देवकोटा, गोरखा