बेलायतमा ‘ढोरपाटन’
काठमाडौँ — हिउँदमा ढोरपाटनका सबै गाउँले बेंसी झर्छन् । अनि, गाउँको रेखदेख दुई कुरुवा महिलाले गर्छन् । ७५ वर्षका ती दुई बूढीआमै सम्बन्धले भने सौता हुन् ।
तिनै दुई जना मिलेर हिउँद काट्दाको कष्ट र उनीहरूको सम्बन्ध देखाइएको वृत्तचित्र हो, ‘ढोरपाटन’ । यही वृत्तचित्र बेलायतको प्रमुख डकुमेन्ट्री फेस्टिभल ‘सेफिल्ड डकफेस्ट’ मा वर्ल्ड प्रिमियर हुने भएको छ ।
जुन १४ देखि १९ सम्म चल्ने महोत्सवको चौथो दिन मुख्य प्रतिस्पर्धामध्येको ‘इन्टरनेसनल फस्ट फिचर कम्पिटिसन’ मा वृत्तचित्र देखाइन लागेको हो । राजन कठेत र सुनीर पाण्डे निर्देशित ७८ मिनेटको ‘ढोरपाटन’ लाई अंग्रेजी नाम भने ‘नो विन्टर होलिडेज’ दिइएको छ ।
निर्देशक कठेतले डकुमेन्ट्रीको तयारी सन् २०१८ देखि नै सुरु गरिएको बताउँछन् । निर्माण टिमले त्यति बेलादेखि विभिन्न कार्यशालादेखि पिचिङ कार्यक्रममा डकुमेन्ट्रीलाई सहभागी गराउँदै आएको थियो । त्यही क्रममा २०२१ मा सेफिल्डकै ‘द विकर्स’ भन्ने पिचिङ कार्यक्रममा ‘ढोरपाटन’ छनोटमा पर्यो । करिब एक करोड रुपैयाँ बराबरको अनुदान रहेको पिचिङ कार्यक्रमको शीर्ष पाँचमा पर्यो वृत्तचित्र ।
डकुमेन्ट्री खिच्न दुई निर्देशकसँगै छायाकार बबिन दुलालले ढोरपाटनमा सय दिन बिताएका थिए । अध्ययनका लागि टिमले एउटा हिउँदमा १० दिन बिताएको थियो । त्यसपछिको हिउँद वृत्तचित्र खिच्न राजन, सुनीर र बबिनले ७० दिन बिताए । त्यसपछि शरद र वसन्त ऋतुमा दस/दस दिन लगाएर खिचे ।
‘बूढीआमा बस्ने घरबाट आधा घण्टामा पुगिने होटलमा हामी बस्यौं । हिउँ परेको बेला, केही कठिन भए पनि हामी तयारीसहित पुगेका थियौं,’ निर्देशक कठेतले भने, ‘बुढ्यौली हुनु के हो ! प्रकृतिसँग जुधेर बूढीआमैहरू कसरी बाँचिरहेका छन् भन्ने कुरा हामीले वृत्तचित्रमा देखाएका छौं ।’ वृत्तचित्रको सम्पादन भने किरण श्रेष्ठले गरेका हुन् ।
प्रकाशित : जेष्ठ १०, २०८० ०७:१७
