'बुद्ध थिएटर फेस्टिभल' चैत १३ देखि
काठमाडौँ — चैत १३ गतेदेखि 'बुद्ध थिएटर फेस्टिभल'को तेस्रो संस्करण सुरु हुने भएको छ । जमलस्थित सांस्कृतिक संस्थानमा आयोजना हुने फेस्टिभल चैत १७ सम्म चल्ने आयोजकले जनाएको छ ।
गौतम बुद्धको दर्शन तथा बोधिसत्वको प्रभावलाई रंगमञ्चमार्फत विश्वसामु चिनाउने उद्देश्यले फेस्टिभल आयोजना गरिएको महोत्सवका निर्देशक पुष्कर गुरुङले बताए । फेस्टिभलमा ६ नाटक मञ्चन गरिनेछ ।
त्यस्तै माया थापाको निर्देशनमा तयार भएको नृत्य नाटिका 'चण्डालीका' समेत मञ्चन हुनेछ । रंगकर्मी अनुप बराललाई उद्घाटनमा नगद ५० हजारसहितको 'डबली अवार्ड' प्रदान गरिनेछ । यसअघि फेस्टिभलमा विदेशी नाटक पनि मञ्चन भएको थियो । तर, कथावस्तु नमिलेपछि यो पटक विदेशी नाटक नराख्ने योजना भएको आयोजकले जनाएको छ । यो फेस्टिभल वाग्मती प्रदेश सरकारको सहयोग, सांस्कृतिक संस्थान र डबली थिएटरको आयोजनमा हुन लागेको हो ।
