'पठान'को ३ दिनको कमाइ : ३ सय करोडभन्दा बढी
काठमाडौँ — शाहरुख खान, दीपिका पादुकोणअभिनित चलचित्र 'पठान' ले ३ दिनमा विश्वभरबाट ३ सय करोड भारतीय रुपैयाँभन्दा बढी कमाएको छ ।
यशराज फिल्म्सका अनुसार हिन्दी भर्सनले रिलिजको तेस्रो दिन ३८ करोड भारतीय रुपैयाँ कमाएको छ । अन्य भाषाबाट १ करोड २५ लाख कमाइ भएको फिल्म्सले जनाएको छ ।
जनवरी २५ मा 'पठान' हिन्दीका साथै तमिल र तेलुगू भाषामा रिलिज भएको थियो । भारतीय समाचार एजेन्सी पीटीआईका अनुसार 'पठान'ले विश्वभरबाट पहिलो दिन १०६ करोड र दोस्रो दिन ११३ करोड रुपैयाँ कमाएको छ । तीन दिनमा चलचित्रले घरेलु बजारमा २०१ करोड र भारतबाहिर ११२ करोड कमाएको छ । अहिलेसम्म चलचित्रले ३१३ करोड भारतीय रुपैयाँ कमाएको बलिउडका ट्रेड एनालिस्ट तरण आदर्शले जनाएका छन् ।
इन्डियन एक्सप्रेसका अनुसार विश्वका १ सयभन्दा बढी देशका करिब ८ हजार स्क्रिनमा 'पठान' प्रदर्शन भएको छ । पठानले विभिन्न रेकर्डसमेत तोडेको छ । 'पठान' एक दिनमा ७० करोड कमाउने पहिलो हिन्दी चलचित्र बनेको छ । यशराज ब्यानरमा बनेको फिल्ममध्ये बक्स अफिस कलेक्सनमा ५० करोड नघाउने तेस्रो फिल्म हो । यसअघि 'वार' ले ५३ करोड र 'ठग्स अफ हिन्दोस्तान' ले ५२ करोड कमाएका थिए ।
सिद्धार्थ आनन्दको निर्देशनमा बनेको 'पठान' मा शाहरुख र दीपिका अलावा जोन अब्राहम, डिम्पल कपाडिया, आशुतोष राणालगायतका कलाकारको अभिनय रहेको छ ।
प्रकाशित : माघ १४, २०७९ १९:४०
