शैलीमा 'माउजङ बाबुसाहेबको कोट' मञ्चन हुँदै - मनोरञ्जन - कान्तिपुर समाचार
कान्तिपुर वेबसाईट
AdvertisementAdvertisement

शैलीमा 'माउजङ बाबुसाहेबको कोट' मञ्चन हुँदै 

कान्तिपुर संवाददाता

काठमाडौँ — भवानी भिक्षुद्वारा लिखित 'माउजङ बाबुसाहेबको कोट' कथामाथि नाटक तयार भएको छ । सविन न्यौपानेको नाट्य रुपान्तरण र विवेक न्यौपानेको निर्देशनमा बनेको यो नाटक माघ ९ देखि २५ सम्म शैली थिएटरमा मञ्चन हुनेछ । 

'माउजङ बाबुसाहेबको कोट'मा माउजङ पात्रको कोटप्रतिको लगाव, देशमा आएको राजनैतिक परिवर्तनले उनको जीवनमा पारेको प्रभाव समेटिएको छ । एक विर्तावाल घरानिया राणाको कथा समावेश 'माउजङ बाबुसाहेबको कोट' वर्तमान समाजसँग पनि मिल्दो हुँदा त्यसको नाट्य रुपान्तरण गरेको लेखक सविन बताउँछन् ।

नाटकमा माउजङ बाबुसाहेबको भूमिकामा सरोज अर्यालले अभिनय गरेका छन् । त्यस्तै रानीसाहेबको चरित्रलाई रीता थापाले मञ्चमा प्रस्तुत गरेकी छन् । नाटकमा उनीदुईसँगै कलाकारहरु सन्तोष थापा, सानु पाण्डेय, प्रनेश गौतम, सुनील खड्का, सविन लुईंटेल, दिवाकर घिमिरे, वीरेन्द्रसिंह कुसवाहा र ओसन कार्कीको अभिनय छ ।

प्रकाशित : माघ १०, २०७९ १३:०६
प्रतिक्रिया
पठाउनुहोस्

हुम्लामा फेरि हिमपात

कान्तिपुर संवाददाता

काठमाडौँ — हुम्लामा फेरि हिमपात भएको छ । सोमबार रातिबाट सुरु भएको हिमपात अहिले पनि लगातार हिमपात भइरहेको छ । हिमपातले हुम्लाको जनजीवन झन् कष्टकर बनेको छ ।

हिमाली जिल्ला हुम्लामा दोस्रो र ठूलो हिमपात हो । जिल्ला भरि नै हिमपात भएपछि हुम्लाका दक्षिणी भेगका केही बस्ती बाहेक पूरै हुम्लाका गाउँबस्ती नै सेताम्य देखिएका छन् । हिउँ आउने क्रम जारी छ । हिमपातले गर्दा हुम्लाको एक मात्र हवाई यातायात सेवा पनि अवरुद्ध भएको छ ।

सोमबार रातिदेखि लगातार हिमपात हुँदा उत्तरी नाम्खा गाउँपालिकाको लिमी, यारी, मुचु चालाका स्थानीयलाई कष्टकर बनेको छ भने आवतजावतमा समस्या भएको हुम्लाका नागरिक अगुवा बसन्त रोकायाले बताए । हिमपातसँगै चिसो बढेपछि सरकारी कार्यालयका कर्मचारी आगो तापेर काम गरिरहेका छन् ।

हिमपात हुँदा हिमालपारिको गाउँ लिमीका चौरीसहित अन्य पशु उच्च जोखिममा परेका छन् । हिमपातले वनमा भएको घाँस पुरिँदा गाउँमा घाँसकोे अभाव छ । जसबाट हजार चौरीसहित गाउँका अन्य पशु उच्च जोखिममा परेका हुन् । घाँस अभावले पशु जोगाउन कठिन भएको लिमीका पशुपालक किसानहरुले बताएका छन् । यस वर्ष हिउँले घाँस छोपिएपछि पशु पाल्न कठिन भएको छ । घाँस नहुँदा भएको पशुसमेत जोगाउन धौधौ भएको स्थानीय पशुपालक किसानले बताएका छन् ।

हिमपातका कारण हुम्लामा चिसो बढेको छ । सिमकोटको तापक्रम माइनस १३ मा झरेको छ । हुम्लाका दक्षिणी भेगका केही बस्तीमा बाहेक जिल्ला भरि नै हिमपात भएको जिल्ला प्रहरी कार्यालय हुम्लाले जनाएको छ । जिल्लामा हिमपात हुँदा सदमुकाम सिमकोटबाट देखिने सबै क्षेत्रहरु सेताम्य भएका छन् । हिमपातले हुम्लाको जनजिवन कष्टघर बनाएको छ । हिमपातले बाली सप्रने भन्दै हुम्लाका कृषकहरु उत्साहित भएका छन् ।

प्रकाशित : माघ १०, २०७९ १३:०४
पूरा पढ्नुहोस्
प्रतिक्रिया
पठाउनुहोस्
×