बेनी-दरबाङ सडकको घुमाउनेमा २५ वर्षदेखि पहिरो बाधक
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
म्याग्दी — म्याग्दीको पश्चिम भेगका मंगला, मालिका र धवलागिरि गाउँपालिकासहित बाग्लुङको पश्चिम बुर्तिबाङ तथा ढोरपाटन हुँदै रुकुम जोड्ने सडक हो, बेनी–दरबाङ–मुना सडक । यो सडकको सदरमुकाम बेनीदेखि १० किमि पश्चिम तातोपानी–बाबियाचौर खण्डको घुमाउने भीरमा पहिरोले ८ दिनदेखि यातायात अवरुद्ध छ । घुमाउने भीरमा २५ वर्षदेखि एकै स्थानमा निरन्तर पहिरो खस्दै आएको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![बेनी-दरबाङ सडकको घुमाउनेमा २५ वर्षदेखि पहिरो बाधक](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/money-finance/beni-darbang-road-2-2272024035909-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
सडक खनेसँगै सुरु भएको पहिरो रोकथाम गर्ने वा विकल्प खोज्ने प्रयास भने अहिलेसम्म हुन सकेको छैन । वर्षाका कारण पहिरो निरन्तर खसिरहेकाले अझै केही समय यातायात सञ्चालनमा ल्याउन सक्ने सम्भावना नभएको पूर्वाधार कार्यालय म्याग्दीका सूचना अधिकारी इन्जिनियर अर्जुन शर्माले बताए । यो पहिरो रोकथाम वा विकल्पबारे केही लेखापढी नभएको उनले जनाए ।
‘यो सडक हेर्ने जिल्लाको निकाय हामी नै हौं । अहिलेसम्म यो पहिरो रोकथाम गर्ने कुनै अध्ययन भएको पनि भेटिँदैन । म्याग्दी खोलामा एउटा १८–२० मिटर लामो ट्रस्टब्रिज हुने हो भने वैकल्पिक बाटो तयार हुन्छ । त्यही पनि जिल्लाका सरोकारवालाले चासो राखेका छैनन्,’ शर्माले भने ।
तत्कालीन जिल्ला विकास समितिले ०५६ मंसिरदेखि २० लाख र पश्चिम भेगमा पर्ने साविकका २० वटा गाविसको १–१ लाख बजेट जुटाएर बेनी–दरबाङ २४ किमि सडक खन्न सुरु गरेको हो । सुरु वर्ष फापरखेतसम्म १० किमि सडक निर्माण भएको थियो । बेनी–दरबाङ सडक खन्न सुरु गर्दा सदरमुकाम बेनीमा मोटर आइपुगेको थिएन । अहिले पहिरो फैलिँदै जाँदा समस्या भएकाले अब वैकल्पिक बाटो नै प्रयोग गर्नुपर्ने अवस्था आएको तत्कालीन जिविस म्याग्दीका सभापति रहेका नवराज शर्माले जनाए ।
जिल्लाको पश्चिम भेगको लाइफलाइन भनी चर्चा गरिएको घुमाउने पहिरो बेनी नगरपालिका–४ तातोपानीको फापरखेत र मंगला गाउँपालिका–२ सिमलचौर सीमामा पर्छ । करिब १ सय ५० मिटर चौडा फैलिएको पहिरोग्रस्त ठाउँ भिरालो पाखो गेग्रानयुक्त भएकाले सामान्य वर्षा हुँदा पनि गेग्रान बगाएर सडकमा थुपार्ने गरेको छ ।
अहिले बेनीबाट फापरखेत हुँदै म्याग्दी नदीमाथिको पक्की पुल तरेर पारि मंगला गाउँपालिका–४ पखेरबस्तीसम्म पुगिन्छ । पखेरमा यात्रु ओर्लेर करिब ५ सय मिटर पैदल हिँडेर म्याग्दी खोलाको अर्को झोलुंगे तरेर सिमलचौरबाट अर्को गाडी चढ्नुपर्ने बाध्यता छ । पखेर र सिमलचौरबीचमा म्याग्दी नदीमाथि अर्को मोटर पुल निर्माण भए करिब ५ सय मिटर थप दूरीमा घुमाउने भीरको वैकल्पिक सडक तयार हुन्छ ।
‘घुमाउनेको पहिरोमा अहिलेसम्म करोडौं रकम बग्यो । अब यो पहिरोको विकल्प खोज्ने समय आएको छ । हामीले पहल र प्रयत्न सुरु गरेका छौं । वैकल्पिक सडकका लागि जग्गासमेत व्यवस्थापन गरेका छौं । पहुँचवालाकोमा मात्रै बजेट पर्दा हामीले सास्ती र गाली खाएका छौं,’ मंगला गाउँपालिका अध्यक्ष सतप्रसाद रोकाले भने, ‘लेखापढी अगाडि बढाउने कार्यालय पनि उस्तै छन्, जति भने पनि नसुन्ने, नटेर्ने । हिउँदमा सुत्ने, बर्खा लागे चिच्याउने भएको छ ।’
![](https://assets-cdn.ekantipur.com/uploads/source/ads/900-x-100-1-0282024055738.gif)