![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
धनगढी — कैलालीमा हैजा र कञ्चनपुरमा दादुरा–रुबेलाका बिरामी फेला परेका छन् । स्वास्थ्य कार्यालय कैलालीका अनुसार धनगढीस्थित पशुपति टोलका २३ र २६ वर्षीय दुई युवकमा बिहीबार हैजा पुष्टि भएको हो । थप एक बालिकामा पनि हैजाको शंका रहेको तर पुष्टि हुन सकेको छैन । हाल उनको सेती प्रादेशिक अस्पताल धनगढीमा उपचार भइरहेको छ ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![कैलालीमा हैजा र कञ्चनपुरमा दादुरा-रुबेला ‘आउटब्रेक’](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/dadura-2672024033959-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
यस्तै, कञ्चनपुरका शुक्लाफाँटा नगरपालिका–११ का एक नौ वर्षीय र अर्का एक चार महिने बालकमा दादुरा–रुबेला पुष्टि भएको स्वास्थ्य निर्देशनालयले जनाएको छ ।
‘सेती प्रादेशिक अस्पतालमा हैजाका बिरामी पुष्टि हुनु जोखिमको कुरा हो । तर अवस्था नियन्त्रणभन्दा बाहिर होइन, सतर्कता अपनाउनुपर्ने भएको छ,’ निमित्त निर्देशक डा. खगेन्द्र बमले भने, ‘यसलाई समुदायमा फैलिनबाट रोक्नुपर्ने छ ।’
हैजा र दादुरा रुबेला ‘आउटब्रेक’ भएपछि शुक्रबार सामाजिक विकास मन्त्रालयको सचिवस्तरीय बैठकको निर्णय अनुसार चिकित्सक, प्रयोगशाला, जनस्वास्थ्यकर्मी, प्रशासनिक प्रतिनिधि लगायत सम्मिलित द्रुत प्रतिकार्य टोली (आरआरटी) परिचालन गरिएको जनाइएको छ ।
बैठकबाट संघीय स्वास्थ्य तथा जनसंख्या मन्त्रालय, सामाजिक विकास मन्त्रालय, स्वास्थ्य कार्यालय र स्थानीय तहको एक टोली बनाई सम्बन्धित स्थानीय तहमा टोली परिचालन गर्ने निर्णय भएको मन्त्रालयका प्रवक्ता हेमराज खड्काले बताए । उनका अनुसार ती स्थानमा स्वास्थ्यकर्मीको टोली परिचालन भइसकेको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)