विद्युत प्राधिकरणको लापरबाहीले ज्यान गुमाउँदै स्थानीय
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
बझाङ — गत शनिबार बिहान खेतमा पानी लगाउन गएको बेला केदारस्युँ गाउँपालिका –१ बिलीका २५ वर्षीय रामकुमार भण्डारीको करेन्ट लागेर मृत्यु भयो । शनिबार बिहान चौडामबगरनजिक पर्ने धामीराटी सिंचाई कुलोबाट गहुँ खेतमा पानी लगाउन गएका उनको घटनास्थल मै ज्यान गएको हो ।
![](https://assets-cdn.ekantipur.com/uploads/source/ads/900x100-1172024092759.gif)
![विद्युत प्राधिकरणको लापरबाहीले ज्यान गुमाउँदै स्थानीय](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/current-bajhang-11122023082422-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
१० बजेतिर गहुँ खेतमा पानी लगाउन घरबाट निस्किएका भण्डारी अबेर सााझसम्म पनि घर नफर्केपछि आफन्तले खोजी गर्दा चौडामबगरको कान्द्वाल भीरमा रात आठ बजेतिर मृत फेला परेका थिए । घटनास्थलमा पुगेका जिल्ला प्रहरी कार्यालयका प्रहरी निरिक्षक दिपेश चौधरीले विद्युतको हाइटेन्सन तार टाउकोले छुन सक्ने ठाउँमा रहेको र निहुरिएर उठ्ने क्रममा तारमा छोइएर करेन्ट लागेको हुन सक्ने बताए ।
केदारस्युँ गाउँपालिकामा करेन्ट लागेर स्थानीयले ज्यान गुमाएको यो पहिलो घटना भने होइन । यस अघि २०७८ साल साउनमा वडा-१ कै ४८ वर्षिया उजलीदेवी बोहराको पनि राष्ट्रिय प्रशारण लाइन मै करेन्ट लागेर मृत्यु भएको थियो । घाँस काटन जानेक्रममा केदारस्युँको गाज्रा भन्ने बाटोमा हिंडिरहेको बेला विद्युतको पोलमा छोइदा करेन्ट लागेर उनको पनि घटनास्थलमै ज्यान गएको थियो ।
लापरबाहीपूर्वक विद्युतको तार छोडिएका कारण यहाँ करेन्ट लागेर घाइते भएका घटनाहरु पनि दोहोरिरहेका छन् । गएको कार्तिक महिनामा मात्रै यही वडाकी २२ वर्षिया महिन्द्रा साँउद भण्डारी पनि करेन्ट लागेर घाइते भएकी थिएन् । डालेघाँस काट्न रुख चढेका बेला सिमलको रुखमा छोइएको विद्युतको तारको झड्का लागेर उनी जयपृथ्वी राजमार्गमा खसेकी थिएन । उनको अहिले पनि उपचार भइरहेको छ ।
२०७७ साल चैत महिनामा केदारस्युँ गाउँपालिका –१, कापडी गाउँकी १३ वर्षिया कौसल्या भण्डारी पनि करेन्ट लागेर गम्भीर घाइते भएकी थिइन् । गोठालो गएकोले विद्युतको तार खुट्टाले छोइँदा उनलाई झड्का लागेको थियो । लामो समय उपचार गरेपछि उनी अहिले हिँडडुल गर्न सक्ने भएको उनको परिवारले जानकारी दिएको छ ।
विद्युत प्राधिकरणले लापरवाहीपूर्वक तार छोडेका कारण पटकपटक दुर्घटना भइरहेको भएपनि सुरक्षाका उपाय अबलम्बन नगरेको स्थानीयले आरोप लगाएका छन् । ‘केदारस्युँको- १ मा मात्रै दर्जनौं ठाउँमा लापरबाहीपूर्वक तार छोडिएको छ । ढलेका पोल पनि उठाइएका छैनन् । बेताल माध्यमिक विद्यालयका शिक्षक दीर्घ भण्डारीले भने ‘करेन्ट लागेर मान्छेहरु मर्न थाले । घाइते हुन थाले व्यवस्थित गरिदिनुहोस भन्दा प्राधिकरणले सुन्दैन ।' उनले शनिबार भएको घटनामा प्रहरीले घटनास्थलको नाप गर्दा विद्युतको तार जमिनबाट ५ फिट ९ इन्च मात्रै उचाईंमा रहेको पाइएको र सीधा उभिँदा मृतकको तालुमा करेन्ट लागेको हुनसक्ने बताए ।
केदारस्युँ गाउँपालिका-१, का स्थानीयका अनुसार नारुगौंडा र तुसारी झार भन्ने ठाउँमा विद्युतको पोल बांङगो भएर तार लत्रिएको छ महिना भैसक्दा पनि व्यवस्थित गरिएको छैन । यही वडाको चौडाम गाउँको तोलेनी, बिलैबगर, जुडे ओडार र नाथ बस्तीनजिक तारको उचाई जमिनबाट छ फिट भन्दा कम रहेको र यहाँ पनि दुर्घटनाको सम्भावना छ । सोही वडाको पथुडा, नुवाँपनाला, चौडाम बगर र सिमल रुख भन्ने ठाउँमा विद्युतको तारले हरियो रुखलाई छोएको हुनाले दुर्घटनाको जोखिम रहेको छ ।
वडा कार्यालयले यहाँको समस्याको बारेमा लिखित र मौखिक रुपमा जानकारी दिएको भएपनि विद्युत प्राधिकरणले वास्ता नगर्दा पटकपटक दुर्घटना भइरहेको वडा नम्बर १ का वडा अध्यक्ष वीरबहादुर भण्डारीले बताए । ‘यो-यो ठाउँमा समस्या छ भनेर हामीले प्राधिकरणलाई पटक-पटक भन्दै आएका छौं । मौखिक रुपमा भन्दा नमानेपछि तीन महिना अगाडि त पत्रै काटेर पनि अनुरोध गर्यौं',भण्डारीले भने, ‘हाम्रो अनुरोधलाई उहाँहरुले वास्तै गर्नु भएन । आज यस्तो घटना भयो ।'
प्राधिकरणको लापरबाहीले गर्दा वडाभरी नै विद्युतीय धराप विच्छ्याए जस्तो भएको र कुन बेला दुर्घटना हुने हो भन्ने डरले स्थानीय त्रसित भएको उनले बताए ।
यता नेपाल विद्युत प्राधिकरणको बझाङ वितरण केन्द्रका प्रमुख सुजन खड्का भने विद्युतको तार जमिन नजिक रहेको कुरा कतैबाट जानकारी नआएको कारण दुर्घटना भएको बताए ।
‘यो पाँच वर्ष पहिला निर्माण भएको लाइन हो । ठाउँ ठाउँमा बिग्रिएको छ । जोखिम रहेको ठाउँमा हामीले आफैं पत्ता लगाएर पनि तारलाई व्यस्थित गर्ने गरेका छौं,' उनले भने, ‘शनिबार घटना भएको ठाउँमा हामीलाई कसैले जानकारी पनि गराएन । भिरमा भएकोले हाम्रो पनि नजर परेन । त्यसैले दुर्घटना भयो ।' उनले विद्युतको तार कतै जोखिमपूर्ण अवस्था रहेको भए तत्काल व्यवस्थित गरिने समेत बताए ।
![](https://assets-cdn.ekantipur.com/uploads/source/ads/900-x-100-0172024023126.gif)