अछामका चार पालिका बल्ल पुगे बिजुलीको सहज पहुँचमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
अछाम — अछामको पूर्वी क्षेत्र कमलबजारमा नेपाल विद्युत् प्राधिकरणले ३३/११ केभी सबस्टेसन शुक्रबारदेखि सञ्चालनमा ल्याएपछि चार स्थानीय तह सहज पहुँचमा पुगेका छन् । यसअघि सोही क्षमता बराबरको सबस्टेसन साँफेबगरमा मात्रै थियो ।
![](https://assets-cdn.ekantipur.com/uploads/source/ads/900x100-1172024092759.gif)
![अछामका चार पालिका बल्ल पुगे बिजुलीको सहज पहुँचमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/miscellaneous/bijuli-4-09122023084033-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
जिल्लाका १० स्थानीय तहका सबै ठाउँमा साँफेबगरबाट बिजुली आपूर्ति हुँदै आएकोमा अब पूर्वी क्षेत्रका कमबलजार, पञ्चदेवल विनायक नगरपालिका, तुर्माखाँद, ढकारी गाउँपालिका र मंगलसेन नगपालिकाको केही क्षेत्रमा कमलबजारबाट विद्युत् आपूर्ति हुनेछ । यसका साथै कर्णाली प्रदेशको दैलेख र कालीकोटमा पनि कमलबजारबाट बिजुली लैजान सकिनेछ ।
भौगोलिक हिसाबले र सुदूरपश्चिमको पहाडी जिल्लामा यसअघि विद्युत् आपूर्ति सहज हुन नसकेको नेपाल विद्युत् प्राधिकरण प्रादेशिक कार्यालय सुदूरपश्चिम प्रमुख जंगबहादुर चन्दले बताए । अछाम जिल्लालाई पूर्ण विद्युतीकरण जिल्ला बनाउने योजनाअनुसार गुणस्तरीय विद्युत् आपूर्तिका लागि कमलबजारमा सबस्टेसन राखेको उनले बताए ।
‘यसअघि अछामभर साँफेबगरमा भएको सबस्टेसनबाट मात्रै विद्युत् आपूर्ति हुँदै आएको थियो । मंगलसेन, साँफेबगरलगायतका केही क्षेत्रमा मात्रै गुणस्तरीय विद्युत् सञ्चालनमा थियो,’ उनले भने, ‘एकमात्र सबस्टेसनबाट विद्युत् आपूर्ति हुने हुँदा कमलबजार, ढकारी, विनायक तुर्माखाँदमा भोल्टेज पुगिरहेको थिएन । पटकपटक समस्या पनि भइरहेको थियो । अब त्यो समस्या हटेको छ ।’
चालु आर्थिक वर्षमा संघीय सरकाले अछामलाई पूर्ण विद्युतीकरण जिल्ला बनाउनका लागि १ अर्बभन्दा बढी बजेट विनियोजन गरेको चन्दले बताए । उनका अनुसार ठेक्का पनि भइसकेको छ भने अब निर्माण कम्पनीसँग सम्झौताको काम मात्रै बाँकी रहेको छ । ‘फिल्डमा गएरै काम गराउने, नापजाँच गर्ने, समन्वय गर्ने र निर्माण कम्पनीले समयमा काम सम्पन्न गरेन र लापरबाही गर्यो भने ठेक्का तोड्नेसम्मको अधिकार प्रदेश कार्यालयलाई छ,’ चन्दले भने ।
पञ्चदेवल विनायक नगरपालिकाका ५ वडा , ढकारी गाउँपालिकाका ५ वडा,र तुर्माखाँद गाउँपालिकाका ५ वडा गरी १५ वडा अहिलेसम्म विद्युत्को पहुँचमा पुग्न नसकेकोमा अब सहज हुने उनले बताए ।
अछामको दुर्गम मानिएका यी वडामा कतै पोल गाडिएका छन् भने कतै विद्युत् जडानको प्रक्रिया नै अगाडि नबढेको तुर्माखाँद गाउँपालिकाका अध्यक्ष डम्बर बीसीले बताए । ‘हाम्रो गाउँपालिकाको भुलु र रहफलाई केन्द्रीय विद्युत् प्रसारण लाइनसँग कर्णाली प्रदेशको दैलेख जिल्लाबाट जोड्ने काम अन्तिम चरणमा पुगेको छ । अन्त पनि पोल आइरहेका छन् । गाउँपालिकाले पनि बजेट छुट्याएको छ,’ उनले भने ,‘यसअघि विद्युत् पुगेको ठाउँमा पनि राम्ररी काम गरेको थिएन । अब कमलबजारको सवस्टेसनले सहज हुने देखिन्छ ।’
![](https://assets-cdn.ekantipur.com/uploads/source/ads/900-x-100-0172024023126.gif)