दोधारा चाँदनीमा प्रसूति शल्यक्रिया सेवा सुरु

मंगलबार पहिलो पटक शल्यक्रियाबाट एक महिलाले प्रसूति सेवा लिएकी छन् । दोधारा चाँदनी नगरपालिका ६ की २० वर्षीया सुनिता सुनारले पहिलो सन्तानका रुपमा मंगलबार बिहान शिशु जन्माएकी हुन् । व्यथा लागेर अस्पताल पुगेकी उनको प्रसूतिमा जटिलता देखिएपछि शल्यक्रिया गरिएको अस्पतालका सूचना अधिकारी नन्दराज भट्टले बताए । उनका अनुसार शिशु र आमा दुवैको स्वास्थ्य सामान्य रहेको छ ।

अस्पतालमा शल्यक्रिया सेवासॅंगै रक्त सञ्चार केन्द्र पनि स्थापना गरिएको छ । रक्तदाताको नामावली पनि संकलन गरिएको अस्पतालले जनाएको छ ।

दोधारा चाँदनी नगरपालिकाको स्वास्थ्य शाखाका प्रमुख जयसिंह महराका अनुसार गत आर्थिक वर्षमा अस्पतालमा ४३२ जनाले सुत्केरी सेवा प्राप्त गरेका छन् । स्वास्थ्य शाखाले संस्थागत सुत्केरी गराउनेको संख्या ७ सय पुर्‍याउने लक्ष्य राखेको छ ।

नगरपालिका र स्वास्थ्य सेवा विभागको सहकार्यमा शल्यक्रिया सेवा सुरु भएको हो । यसै साता नगर प्रमुख किशोर लिम्बुले शल्यक्रिया कक्षको उद्घाटन गरेका हुन् ।

अहिले अस्पतालमा एक जना एमडिजीपी र तीन जना मेडिकल अधिकृत छन् । यसैगरी प्रसूति शल्यक्रियाका लागि तालिमप्राप्त जनशक्ति तयार गरिएको छ । निक साइमन इष्टिच्युटले पनि जनशक्ति र उपकरणमा सहयोग गरेको स्वास्थ्य शाखा प्रमुख महराले बताए ।

‘दोधारा चाँदनीका लागि स्वास्थ्य क्षेत्रमा ठूलो परिवर्तन हो,’ दोधारा चाँदनी नगरपालिकाका प्रवक्ता ओम बस्नेतले भने, ‘कुनै बेला सामान्य उपचारका लागि पनि महेन्द्रनगर वा भारततर्फ धाउनुपर्थ्यो, अहिले धेरैजसो सेवाहरु यहीँबाट प्रदान भइरहेका छन् ।’ अस्पतालमा प्रयोगशालाको पनि स्तर बृद्धि गरिएको छ ।

यसअघि प्रसूतिको क्रममा हुनसक्ने जटिलताका कारण कञ्चनपुरको दोधारा चाँदनी अस्पतालबाटै सामान्य अवस्थामा पनि रिफर गर्नुपर्ने बाध्यता थियो । गत आर्थिक वर्षमा अस्पतालमा प्रसूति सेवाका लागि आएकामध्ये ९३ जनालाई रिफर गरिएको थियो ।