तलबभत्ता नपाउँदा धनगढीका स्वास्थ्यकर्मी आन्दोलित
धनगढी — धनगढी उपमहानगरपालिकामा कार्यरत स्वास्थ्यकर्मीहरू महिनौंदेखि तलबभत्ता नपाएपछि आन्दोलनमा उत्रिएका छन् । गत असोजदेखि नै तलबभत्ता नपाएको भन्दै उनीहरु आक्रोशित बनेका हुन् ।
धनगढी उपमहानगरले संघीय सरकारको स्वास्थ्य मन्त्रालयबाट तलबभत्ता नपठाउँदा स्वास्थ्यकर्मीलाई उपलब्ध गराउन नसकेको जनाएको छ । ‘संघ सरकारबाट समायोजन र सरुवा सहमति लिएर आएका स्थायी स्वास्थ्यकर्मीको तलबभत्ता पनि पठाउँदै आएको थियो,’ मेयर गोपाल हमालले भने, ‘६ महिनादेखि उनीहरुको तलबभत्ता पठाइएको छैन ।’
उनले स्वास्थ्यकर्मीको तलबभत्ताका लागि दुई पटक संघ सरकारको स्वास्थ्य मन्त्रालय धाएको समेत बताए ।उनका अनुसार धनगढी उपमहानगरपालिकामा आवश्यक दरबन्दी संख्या १६ जनाको मात्रै थियो । कर्मचारी समायोजनमा र सरुवा सहमति लिएर ३८ जनाभन्दा बढी स्वास्थ्यकर्मी पठाइएको छ । तर उनीहरुको तलब उपमहानगरले बेहोर्न सक्ने स्थिति नरहेको मेयर हमालको गुनासो छ ।
‘संघ सरकारले कर्मचारी मागेको भन्दा बढी पठाइदिने । तलबभत्ता नियमित नपठाइदिने गरेको छ । स्थानीय तहले उनीहरुको तलबभत्ता खुवाउन सक्दैन,' मेयर हमालले भने ।
आन्दोलनरत स्वास्थ्यकर्मी योगेश अवस्थीले पटक–पटक नियमित तलब पाउन नसकेकाले स्वास्थ्यकर्मी आन्दोलनमा उत्रिनु परेको बताए । उनले अघिल्लो वर्ष पनि ६ महिनासम्म तलब नपाउँदा आन्दोलनमा उत्रिनु परेको बताए ।
‘आन्दोलनमा उत्रेपछि मात्रै तलब संघ सरकारले पठाइदिने गरेको छ,’ उनले भने, ‘स्वास्थ्यकर्मीले नियमित तलबभत्ता पाउन भनेर अहिले निर्णायक आन्दोलनमा छौं ।’ उनले संघ र स्थानीय सरकारले स्वास्थ्यकर्मीलाई नियमित तलबभत्ता पाउने व्यवस्था जसरी पनि मिलाउनुपर्ने बताए ।
‘स्थानीय सरकारले संघबाट सरुवा र समाजोजन भइआएकोले तलब पनि उतैबाट पठाएपछि पाउनुहुन्छ भन्ने गरेको छ,’ उनले भने, ‘संघ सरकारबाट नियमित तलबभत्ता प्राप्त हुँदैन । आन्दोलनमा उत्रिनुपर्ने अवस्थाको सिर्जना हुन्छ । अब यसको अन्त्य आवश्यक छ ।’
स्वास्थ्यकर्मीहरु धनगढीमा आइतबारदेखि अनिश्चितकालीन धर्ना बसेका छन् ।
प्रकाशित : चैत्र १२, २०७९ १८:४६
