दार्चुलामा तुइनबाट खसेर बालक बेपत्ता

वारि र पारिका स्थानीयले लुकिछिपी तुइन राख्ने गरेका छन्, सुरक्षाकर्मी आएर काट्ने डरले नदीमा हुने घटनाबारे सितिमिति मुख खोल्दैनन्
मनोज बडू

दार्चुला — व्यास गाउँपालिका–४ डोकट मेल्पाटाकी राइमती विष्ट बिहीबार चुलोचौको सकेर छिमेकी दौंतरीसँगै घाँस काट्न हिँडिन् । उनीसँगै १० वर्षीय छोरा दीपेन्द्र पनि पछिपछि लागे । छोरासँगै तुइन तर्दा जोखिम हुने ठानेर उनले महाकाली किनारमै छाडिन् र आफू घाँसपात खोज्न डोरीमा झुन्डिएर भारतीय क्षेत्रतिर लागिन् ।

तुइन तरेर राइमती भारतीय क्षेत्रको तवाघाट–लिपुलेक सडकमा पुगिसकेकी थिइन् । सानो छोराले यति ठूलो जोखिम लेला भन्ने उनले अनुमानै गरिनन् । नदी किनारमै रोकिएका दीपेन्द्रले केही बेरपछि डोरीमा झुन्डिएर महाकाली पारि आमासँगै जाने प्रयास गरे, तर नदीमा खसेर बेपत्ता भए । घटनाको तेस्रो दिन बित्दासमेत दीपेन्द्रको अत्तोपत्तो छैन । घटना शनिबार दिउँसो मात्र सार्वजनिक भएको हो । दीपेन्द्र व्यास–४ का स्थित ब्रह्मस्थान आधारभूत विद्यालय डोकटमा ४ कक्षामा अध्ययनरत थिए ।

उनको गाउँनजिकै कौनेणीमा स्थानीयले महाकाली वारपार गर्न तुइन हालेका छन् । आमालाई थाहा नदिई दीपेन्द्र तुइनबाट तर्न खोज्दा महाकालीमा खसेको बुझिएको एक स्थानीयले बताए । तुइनमा झुन्डिनेबित्तिकै दीपेन्द्र महाकाली (नदीको नेपालतर्फकै भाग) मा खसेको भारतीय क्षेत्रमा मजदुरी गरिरहेका मानिसले देखेको स्थानीय जमनसिंह विष्टले बताए । ‘भारतबाट एक मजदुरले घाट (तुइन) बाट एक बच्चा खस्यो भनेपछि उनकी आमाले थाहा पाएकी रहिछन्,’ उनले भने, ‘फोनबाट प्रत्यक्ष देखेका मान्छेसित कुरा भएको थियो । १०/१५ मिटरसम्म बच्चा बगेको देखिएको रहेछ । कोही मान्छे भएको भए समात्न सकिने थियो ।’

प्रहरीले भने घटनाबारे यकिन हुन नसकेको जनाएको छ । तुइनबाट खसेको खबर बुझ्न शनिबार लगातार फोन आउन थालेपछि सुन्सेरा प्रहरी चौकीबाट बेपत्ता बालकको घरमा टोली पठाएको जिल्ला प्रहरी कार्यालयले जनाएको छ । जिल्ला प्रहरीका निरीक्षक जगत गाहामगरका अनुसार चौकीबाट बालकको घर पुग्न अढाई घण्टा लाग्छ । टोली गए पनि फोन सम्पर्क हुन नसकेको उनले बताए । बेपत्ता बालकका बुवा शिवराज वैदेशिक रोजगारीमा छन् ।

घरमा खेतीपातीको चाप नभएपछि व्यास–४ र ५ का सीमावर्ती बासिन्दा घाँसदाउरा गर्न बिहान भारतीय क्षेत्र जाने र साँझ फर्कने गर्छन् । यतिबेला विद्यालयमा हिउँदे बिदा भएपछि घाँस काट्न सक्ने उमेरका बच्चा आमाबुबासँगै घाँसदाउराको जोहो गर्न तुइन तरेर भारतीय क्षेत्रमा जाने गरेको स्थानीय जमनसिंह विष्टले बताए ।

वारि र पारिका स्थानीयले सुरक्षाकर्मीको आँखा छलेर तुइन राख्ने गरेका हुन् । सुरक्षाकर्मी आएर तुइन काट्ने डरले नदीमा हुने घटनाबारे सितिमिति मुख खोल्दैनन् । यसैकारण बिहीबारको यो घटनाबारे पनि हल्ला हुन नसकेको एक स्थानीयले सुनाए । बिहीबार बालक महाकालीमा खसेर बेपत्ता भएको ठाउँबाट करिब ४ सय मिटर माथि मल्घट्टेमा नेपाल–भारत जोड्ने झोलुंगे पुल भए पनि छिटो आउजाउ गर्न जोखिम मोलेरै तुइनबाट महाकाली तर्ने गर्छन् ।

यहाँका बासिन्दा घाँसदाउरासँगै किनमेल तथा कृषि उपज बिक्री, औषधोपचारका लागि अस्पताल जानसमेत तुइन प्रयोग गर्छन् । ‘तुइनको डोरीलाई तान्ने बल सबैलाई नपुगेर र आत्तिँदा धेरै जना लड्ने गरेका छन्,’ व्यास–५ का रामसिंह धामीले भने, ‘तुइनबाट आवतजावत गर्ने क्रममा हरेक वर्ष दुई–तीन जनाको ज्यान जान्छ ।’ व्यास २, ३, ४ र ५ का नागरिक अहिले पनि तुइनबाट महाकाली वारपार गर्छन् । नेपालतिर सडक निर्माणमा भइरहेको ढिलाइले आउजाउ सहज नबन्दा स्थानीयले तुइनको जोखिम मोलेर आवतजावत गर्नुपरेको धामी बताउँछन् ।

प्रकाशित : पुस २३, २०७९ १७:२८
प्रतिक्रिया
पठाउनुहोस्
जनताको राय

छ वर्षअघि अन्त्य भइसकेको यातायात क्षेत्रको सिन्डिकेट ब्युँताउने चलखेल सुरू भएको छ । तपाईंको के राय छ ?