दृष्टिविहीन शिक्षिक शोभा पौडेलले तोडिन् अनशन
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
कास्की — दृष्टिविहीन शिक्षिक शोभा पौडेलले मंगलबार अनशन तोडेकी छन् । मंगलबार साँझ प्रदेश शिक्षा निर्देशनालयको पहलमा भएको छलफलमा तीन बुँदे सहमति जनाउँदै उनले अनशन तोडेकी हुन् ।
![](https://assets-cdn.ekantipur.com/uploads/source/ads/900x100-1172024092759.gif)
![दृष्टिविहीन शिक्षिक शोभा पौडेलले तोडिन् अनशन](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/shova-1-03102023034856-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
पहुँचयुक्त र पायक विद्यालयमा पदस्थापना र हाजिर गराई स्थायी रोजगारको सुनिश्चित गर्ने मागसहित पौडेल पोखरा महानगरपालिका–१ बगरस्थित शिक्षा विकास निर्देशनालय गण्डकी र शिक्षा विकास समन्वय इकाई कास्कीको परिसरमा आमरण अनशन बसेकी हुन् । प्रदेश शिक्षा निर्देशक अम्बिका अचार्यले उनको माग सम्बोधन गर्ने गरी पटक-पटक वार्ता बसेपछि सहमति जुटेको बताए ।
दृष्टिविहीन शोभा पौडेल १५ वर्षदेखि शिक्षण पेसामा आबद्ध छन् । हाल उनी राष्ट्रिय मावि पोखरामा नेपाली पढाउँछिन् । शिक्षा सेवा आयोगद्वारा उनको लमजुङको दोर्दी गाउँपालिकाको बालकल्याण माविमा सरुवा भयो । अपांगता कोटामा निमावि नेपाली विषयमा नाम निकालेकी ३८ वर्षीया शोभालाई त्यो गाउँमा गएर पढाउन कठिन थियो । पायक पर्ने विद्यालयको माग गर्दै उनले सरुवा भए पनि बालकल्याण गएर हाजिर गरिनन् । त्यसपछि उनी अनशन बसिन् । उनलाई पहिला सरुवा भएको विद्यालयमा गएर हाजिर गर्ने सहमति गराइएको छ ।
त्यसपछि पोखरा महानगरमा रहेको ध्रुव माविमा ल्याउने र दुवै विद्यालयबीच सहमति जुटाएपछि शिक्षा विकास समन्वय इकाईले शिक्षा विभागमा पत्र पठाएर तीन महिनाभित्र ठाउँ खाली भएको विद्यालयमा ल्याउने (सरुवा गर्ने) र अनसन तोड्ने तीन बुँदे सहमति भएको शिक्षा निर्देशक आचार्यले बताए । शिक्षण पेसामै आबद्ध उनका पति पनि दृष्टिविहीन छन् । पति पनि मावि तहका स्थायी शिक्षक हुन् । पतिले शिक्षक सेवा आयोगमा नाम निकालेपछि उनी पनि नाम निकाल्न सफल भएकी हुन् ।
![](https://assets-cdn.ekantipur.com/uploads/source/ads/900-x-100-0172024023126.gif)