दोर्दीको दैलुङमा विद्यालय स्थापना

गाउँलेहरू बसाइँ सर्न थाले । ‘हुनेखानेले सहरबजारमा छोराछोरी पढाएका छन् । यहाँका बालबालिका यतिकै राख्न भएन । ठूला भएपछि त हिँडेर पनि जान्छन्‚’ उनले भनिन्, ‘गाउँकै स-साना विद्यार्थी पढाउन विद्यालय खोल्यौं ।’

विद्यालयलाई गाउँकै जलदेवी आमा समूहको भवनमा सञ्चालन गरिएको छ । विद्यालयको नाम जलदेवी प्रावि (आधारभूत) राखिएको छ । विद्यालयमा शिक्षक राजकुमारी गुरुङलाई खटाएको र उनको छोरा पनि उक्त विद्यालयमै भर्ना भएको शिक्षा शाखा प्रमुख भीमप्रसाद लामिछानेले बताए ।

उनका अनुसार अहिले ४ देखि ६ वर्षसम्मका ६ जना विद्यार्थीलाई एउटै कोठामा राखेर पढाउन थालिएको छ । कूल १६ घरधुरी रहेकोमा २ जना छात्र र ४ जना छात्रा गरी ६ जना बालबालिका उक्त विद्यालयमा भर्ना भएका छन् । विद्यार्थी बढ्दै गएमा ५ कक्षासम्म पठनपाठन सञ्चालन गर्न पाइने अनुमति लिइएको छ ।

गाउँमा विद्यालय नहुँदा सानै उमेरका केटाकेटी छिमेकी गाउँ माझखर्कको महेन्द्रज्योति प्रावि, लम्सीबोटको जीवन आधारभूत विद्यालय, कीर्तिपुरको भगवान आधारभूत विद्यालयलगायत जानुपर्ने बाध्यता थियो । सबै विद्यालय पुग्न पैदल एकतर्फी २ घण्टा लाग्ने भएपछि गाउँमै विद्यालय स्थापना गरिएको वडाअध्यक्ष गुरुङले बताइन् । उनका अनुसार गाउँमा विद्यालय स्थापनासँगै विद्यार्थीलाई शैक्षिक सामग्री पनि वितरण गरिएको छ ।

दोर्दी गाउँपालिका अध्यक्ष युवराज अधिकारीले कोही पनि बालबालिका शिक्षाबाट वञ्चित नहून् भन्ने उद्देश्यका साथ विद्यालय स्थापना गरिएको बताए । ‘हामीले विद्यालय मर्ज गरेका छौं । भौगोलिक दुरीको हिसाबले विद्यालय राख्नैपर्ने अवस्था र सञ्चालन गर्नै पर्ने अवस्थामा हामीले राखेका छौं, खोलेका छौं‚’ उनले भने । मर्ज गरिएका विद्यालयको सबै सम्पत्ति नजिकैको विद्यालयमा गाभिएको छ । नयाँ खुलेका विद्यालयको संरचना गाउँपालिकाले बनाउने उनले बताए ।

दोर्दीमा हाल ४८ वटा विद्यालय छन् । यसमा माध्यमिक विद्यालय ८ वटा छन् । निम्न माध्यमिक विद्यालय ६ वटा छन् । अरु सबै प्राथामिक विद्यालय हुन् । यद्यपि अहिले कक्षा १ देखि ८ सम्मलाई आधारभूत विद्यालय भनिन्छ । आधारभूत विद्यालयमा विद्यार्थी संख्या घट्दै गएकोमा विद्यार्थीलाई गाउँ फर्काउने प्रयास गरिएको अध्यक्ष अधिकारीले बताए ।