२२.१२°C काठमाडौं
काठमाडौंमा वायुको गुणस्तर: २०९

ह्वीलचियरमै बसेर एसईई

लमजुङमा २ हजार ७ सय ९२ जनाले १७ परीक्षा केन्द्रबाट परीक्षा दिँदै छन्
आश गुरुङ

लमजुङ — एक जना निरीक्षकलाई सँगै राखेर सुन्दरबजार नगरपालिका–४ पाँचघरेका ईश्वर अधिकारीले जनविकास मावि बेंसीसहरमा एसईई दिएका छन् ।उक्त स्कुलकै परीक्षार्थी उनको केन्द्र भने जनविकास मावि चण्डीडाँडा हो ।

ह्वीलचियरमै बसेर एसईई

जनविकास बेंसीसहरका केन्द्राध्यक्ष जितबहादुर कोइरालाका अनुसार माथिल्लो जनविकास जान नसक्ने भएपछि उनलाई तल्लो जनविकासमै परीक्षा दिने व्यवस्था मिलाइएको हो । बजारबाट चण्डीडाँडाको विद्यालयमा पुग्न सवारी साधनमा करिब १५ मिनेट लाग्छ ।

दुवै खुट्टा नचल्ने उनले ह्वीलचियरमै बसेर परीक्षा दिएका हुन । परीक्षा केन्द्रसम्म उनी टेम्पोमा आएका थिए । ‘ईश्वर हिँड्डुल गर्द सक्दैनन् । दुवै खुट्टा नचल्ने भएपछि कसरी माथि जानु । तलैबाट परीक्षा दिने व्यवस्था मिलाइएको छ । उत्तरपुस्तिका भने माथि (जनविकास चण्डीडाँडा) लगिएको छ’ उनले भने । परीक्षाको तयारी राम्रो गरेको र ढुक्कले परीक्षा दिइरहेको परीक्षार्थी ईश्वरले बताए । बेंसीसहरकै भूपू सैनिक आवासीय मावि केन्द्रमा बेंसीसहर नगरपालिका–१० खासुरबेंसीको जनजागृति माविका परीक्षार्थी सविना तामाङले सहयोगी राखेर परीक्षा दिएकी छन् ।

कक्षा ९ का सोनिया तामाङको सहयोगमा सविनाले परीक्षा दिइरहेको जनजागृतिका प्रधानाध्यापक नन्दबहादुर घलेले बताए । सविनामा हात नचल्ने समस्या छ । ‘लेख्दालेख्दै हातदेखि ज्यान सबै भित्रभित्रै टोक्ने । लेख्नै नमिल्ने भएकाले सहयोगीको व्यवस्था गरेका छौं’ उनले भने । उनलाई केन्द्राध्यक्ष विनोद गुरुङले एक जना निरीक्षक राखेर छुट्टै कोठामा परीक्षा दिने व्यवस्था मिलाएका हुन् ।

बेंसीसहर–२ भकुण्डेको बालकल्याण मावि केन्द्रमा बेंसीसहर–३ बाहुनबेंसीका विजय घिमिरेले सहयोगीको भरमा परीक्षा दिइरहेका छन् । स्थानीय यशोब्रह्म माविका प्रधानाध्यापक सूर्यप्रसाद बरालका अनुसार दायाँ हात भाँचिएपछि विजयले कक्षा ९ मा पढ्ने विपिन बोहराको सहयोग लिएका छन् । उनलाई पनि परीक्षा दिन एक जना निरीक्षकसहित छुट्टै कोठाको व्यवस्था गरिएको केन्द्राध्यक्ष तीर्थराज न्यौपानेले बताए ।

शिक्षा विकास तथा समन्वय इकाई कार्यालयका प्रमुख वीरबहादुर गुरुङका अनुसार शुक्रबारको अनिवार्य अंग्रेजी विषयमा ७ छात्र र ८ छात्रा अनुपस्थित रहे । १ हजार ३ सय ६६ पुरुष र १ हजार ४ सय २६ महिला गरी २ हजार ७ सय ९२ जनाले परीक्षा दिएका छन् । २ परीक्षार्थीले ग्रेडवृद्धिको परीक्षा दिनेछन् । जिल्लामा १७ परीक्षा केन्द्र छन् ।

२ दृष्टिविहीन र ९ सुस्तश्रवण परीक्षामा

गोरखा – जिल्लामा २ दृष्टिविहीन र ९ सुस्तश्रवण विद्यार्थी एसईई परीक्षामा सहभागी छन् । सहिद स्मृति मावि बुंकोटको दृष्टिविहीन छात्राले हिमालय मावि घैरुङ र देवी जलकुमारी मावि थुमिकी दृष्टिविहीन छात्राले भीमोदय मावि आरुघाटबाट परीक्षा दिएका हुन् । त्यस्तै मनकामना बहिरा माविका ९ विद्यार्थी रत्नराज्य मावि विरेन्चोकबाट परीक्षा दिएका छन् ।

एसईईका लागि १२ संस्थागत र १ सय २२ सामुदायिक विद्यालयका विद्यार्थीका लागि २३ परीक्षा केन्द्र छन् । यस वर्षको एसईई दिने तीन हजार ८ सय ४४ परीक्षार्थीमध्ये पहिलो दिन २३ जना अनुपस्थित रहेको जिल्ला शिक्षा तथा समन्वय इकाईका प्रमुख सुवास आचार्यले जानकारी दिए । ग्रेड वृद्धि परीक्षामा १४ जना, प्राविधिकतर्फका ८२ र साधारण ३ हजार ७ सय ४८ परीक्षार्थीले एसईई दिँदै छन् । पहिलो दिनको परीक्षा शान्तिपूर्ण सम्पन्न भएको प्रमुख आचार्यले बताए ।

प्रकाशित : चैत्र १८, २०७९ ०८:३१
प्रतिक्रिया
पठाउनुहोस्
जनताको राय

कांग्रेसले 'वेल' घेरेर नाराबाजी गरिरहेका बेला प्रधानमन्त्रीले प्रतिनिधिसभामा विश्वासको मत लिएको घटनालाई कसरी लिनु भएको छ ?