२३.१२°C काठमाडौं
काठमाडौंमा वायुको गुणस्तर: १६९

प्राकृतिक चिकित्सालयका थेरापी उपकरण एक वर्षदेखि अलपत्र

घनश्याम खड्का

म्याग्दी — बेनी नगरपालिका, ४ तातोपानीमा प्राकृतिक चिकित्सालय खोल्न ल्याइएका तातोपानी थेरापी उपकरणहरू एक वर्षदेखि अलपत्र छन् ।

प्राकृतिक चिकित्सालयका थेरापी उपकरण एक वर्षदेखि अलपत्र

नेपालमा पहिलो पटक प्राकृतिक तातोपानीसँग जोडेर तातोपानी कुण्ड व्यवस्थापन समितिले सौना स्नान, थेरापी र योगालाई जोडेर ‘तातोपानी सामुदायिक प्राकृतिक चिकित्सालय’ अघिल्लो वर्ष संञ्चालनमा ल्याइएको थियो ।

अघिल्लो वर्ष नै मसाज थेरापी, हाईड्रो थेरापी, होमियोथेरापी, फिजियोथेरापी, नेचुरोप्याथिक थेरापी र अकुपंचरका उपकरण ल्याइएको थियो । तर कानुनी अड्चन देखिएको भन्दै ती उपकरण थन्क्याएर राखिएको छ ।

‘प्राकृतिक तातोपानीमा नेपालकै पहिलो तातोपानीमा आधारित प्राकृतिक अस्पताल खोल्न विभिन्न उपकरण ल्याई सेटअप गर्ने क्रममा थियौं । कानुनी प्रकृयामा अल्झन आएपछि रोकिएको अवस्था छ । उपकरणहरु प्लास्टिकले छोपेर राखेका छौं,’ तातोपानी कुण्ड व्यवस्थापन समितिका सदस्य कुमार केसीले धुलाम्मे भएका प्लास्टिकले छोपेका थेरापी उपकरणहरु देखाउँदै भने, ‘लाखौं मूल्यका यी उपकरण चलाउन प्राकृतिक चिकित्सक पनि ल्याएका थियौं । छिटै नयाँ प्रकृयाबाट चलाउने तयारीमा समिति जुटेको छ ।’

संस्था दर्ता ऐन अर्न्तगत दर्ता भएको तातोपानी कुण्ड व्यवस्थापन समिति मार्फत प्राकृतिक सामुदायिक चिकित्सालय संञ्चालन तयारी भइरहँदा समिति भ्याटमा दर्ता हुन र समितिको विधानको उद्देश्यमा प्राकृतिक/प्रविधि चिकित्सालय संञ्चालन गर्ने सम्बन्धी बुँदा थप्न बेनी नगरपालिकाले सुझाएपछि अभियान प्रभावित भएको थिायो ।

‘भ्याट समेतमा अल्झेको सबै कानुनी अल्झन सकिएको छ । अब छिट्टै थन्किएका तातोपानी थेरापीका सामग्री उपयोगमा आई प्राकृतिक चिकित्सालय संञ्चालन आउने छ,’ तातोपानी कुण्ड व्यवस्थापन समितिका अध्यक्ष वीरेन्द्रमान शाक्यले भने, ‘अब कुण्ड व्यवस्थापन समितिको अधिवेशन गरी विधान र प्रबन्ध पत्र संशोधनपछि यही आर्थिक वर्षमा चिकित्सालय संञ्चालन गर्ने योजनामा छौं ।’


तातोपानी कुण्ड व्यवस्थापन समितिले परम्परागत प्राकृतिक तातोपानी पोखरीमा डुबुल्की लगाउँदै आएको उपचार विधिमा योगा थेरापी, मसाज थेरापी, हाईड्रो थेरापी, होमियोथेरापी, फिजियोथेरापी, नेचुरोरोप्याथिक थेरापी र अकुपंचर विधिबाट पनि उपचारका लागि ल्याइएका सबै थेरापीका उपकरण थन्क्याएर राखिएको हो ।

जवकि प्राकृतिक चिकित्सालय खोल्न आर्थिक वर्ष ०७७/०७८ मा संघीय सरकारको अघिल्लो आर्थिक वर्षमा ५० लाख र थेरापीका उपकरण खरिद गर्न गण्डकी प्रदेश सामाजिक विकास मन्त्रालयको ५० लाख बजेट खर्च भइसकेको छ ।

बेनी नगरपालिकाका मेयर सुरत केसीका अनुसार त्रुटि सच्याएर प्रक्रियागत रुपमा आए नगरपालिकाले चिकित्सालय संञ्चालन गर्न अनुमति दिनेछ ।

यद्यपि सबै प्रक्रिया पूरा गरी सकेसम्म छिटो प्राकृतिक अस्पतालबाट सेवा सुरु गर्ने योजनामा आफूहरू रहेको सचिव खड्काले बताएका छन् ।

प्रकाशित : चैत्र १५, २०७९ १६:३६
प्रतिक्रिया
पठाउनुहोस्
जनताको राय

स्वयंसेवी संस्था स्काउटको स्वामित्वमा रहेको सार्वजनिक जग्गा कब्जा गरी वर्षौंदेखि भाडामा लगाउने कांग्रेसका सांसद दीपक खड्कालाई अब के गर्नुपर्छ ?