नेपालगन्ज — बागेश्वरी बहुमुखी क्याम्पस कोहलपुरको स्ववियु अध्यक्षमा एमाले निकट अनेरास्ववियुका देवेन्द्र बुढा निर्वाचित भएका छन् । अध्यक्ष बुढासहित स्ववियुमा अनेरास्ववियुको प्यानल नै निर्वाचित भएको हो ।
नेपाल विद्यार्थी संघकी टीकाकुमारी शाहीलाई पराजित गर्दै बुढा निर्वाचित भएका हुन् । निर्वाचन समितिका अनुसार बुढाले ४ सय ५४ र टिकाले २ सय ४० मत प्राप्त गरे । यस्तै सचिवमा अनेरास्ववियुकै महेन्द्र मल्ल ३ सय १४ मत प्राप्त गरेर निर्वाचित भए ।
उनका निकटतम प्रतिस्पर्धी युवराज विष्टले २ सय ९९ मत प्राप्त गरे । कोषाध्यक्षमा अनेरास्ववियुका सुरेश चदारा ३ सय १२ मत प्राप्त गरेर निर्वाचित हुँदा उनका प्रतिस्पर्धी नवराज विकले २ सय ८५ मत ल्याए ।
सदस्यहरुमा पनि अनेरास्ववियुकै अभिसा बोहोराले ३ सय १७, तिर्थकुमारी नकालले ३ सय ४३, तुलाराम भट्टराईले ३ सय २७, सिर्जना मल्लले ३ सय ३७ मत प्राप्त गरी निर्वाचित भएका छन् ।
स्ववियुमा नयाँ नेतृत्व चयनका लागि आइतबार मतदान गराइएको थियो । मतदानपछि रातिसम्म चलेको थियो ।
मध्यपश्चिम विश्वविद्यालय अन्तर्गत आंगिक क्याम्पसको रुपमा रहेको उक्त क्याम्पसको निर्वाचन यसअघि चैत ३ गतेका लागि तोकिएकोमा स्थगित हुन पुगेको थियो । विश्वविद्यालयले पुनः सूचना निकालेर आइतबार मतदान गराएको थियो
जिल्लामा स्ववियु निर्वाचन हुन गइरहेका पाँच क्याम्पसमध्ये चारवटा त्रिभुवन विश्वविद्यालय र एक मध्यपश्चिम विश्वविद्यालय अन्तरर्गतका क्याम्पस रहेका छन् ।
यस क्षेत्रमै सबैभन्दा बढी विद्यार्थी संख्या रहेको महेन्द्र बहुमुखी क्याम्पसमा भने चैत्र ८ गते स्ववियु निर्वाचन हुँदैछ ।
प्रकाशित : चैत्र ६, २०७९ २१:३०
