काठमाडौँ — नेपाली कांग्रेसका नेता प्रदीप पौडेलले वैकल्पिक राजनीतिको वकालत गर्नेहरूमा पुरानै सत्तालिप्साको प्रवृत्ति देखिएको बताएका छन् । उनले एउटा व्यक्तिलाई बलियो बनाउने र हुन चाहने प्रवृत्तिले लोकतन्त्र र अहिलेको व्यवस्थामाथि सधैं खतरा हुने बताए ।

बुधबार काठमाडौंमा भएको नेपाली राजनीति र लोकतान्त्रिक संस्कारको सवाल विषयक विचार गोष्ठीमा बोल्दै नेता पौडेलले नयाँ व्यवस्थापछिको दोस्रो निर्वाचनबाट पनि जनताले स्थायी सरकार र आर्थिक संमृद्धि मार्ग पहिल्याउन नपाउनु दुःखद भएको बताए ।

‘संविधान जारी भएपछि दोस्रो पटक निर्वाचन भइसकेको छ । कतै यो व्यवस्था माथि नै खतरा त होइन ? भन्ने प्रश्नहरू उठिरहेका छन्,’ उनले भने, ‘तर कसैले नचाहँदैमा, अरुचि राख्दैम यो यतिकै भत्किएर जाने होइन । हामी देख्दैछौँ, अहिले फेरि शालिकहरू ब्युँताउने अभ्यास भइरहेको छ । तर, यो समय शालिक ब्युँताउने होइन, देश र जनताको आर्थिक समृद्धिको विषयमा काम गर्नुपर्ने बेला हो ।’

नेता पौडेलले वैकल्पिक राजनीति गर्छु भनेर आएको नेतृत्वबाट समेत लोकतान्त्रिक मूल्य मान्यताको अभ्यास हुन नसकेको देख्दा भने चिन्ता लागेको बताए । ‘अहिलेको निर्वाचनले वैकल्पिक राजनीतिको वकालत गर्नेहरूलाई बलियो जनमत दिएको छ । सबैलाई उहाँहरूलाई ठूलो आशा थियो । तर, उहाँहरूमा पनि एकदमै थोरै समयमा सत्तालिप्सा देखियो, स्वार्थहरू टकराएको देखियो,’ उनले भने, ‘हामी हाम्रो पार्टीलाई सुदृढ गर्ने र व्यवस्थित गर्ने कुरामा लागेका थियौँ, उहाँहरूसँग सहकार्य गर्न हामी पनि आशावादी थियौँ । तर त्यो एकदमै निराशामा परिणत हुने स्थिति भयो ।’

उनले आफू पहिलो पटक सांसद भएर संसद् प्रवेश गर्दै गर्दा संसद् हो कि चुनावी सभा आफूलाई छुट्याउन नसकेको बताए । ‘म त पहिलो पटक संसद् प्रवेश गरेको हुँ । तर संसद् हो कि चुनावी सभा हो ? छुट्याउन गाह्रो भइरहेको छ । सबैको नजरकेन्द्रित भएको सदनमा झुटो बोल्न, गफ लगाउन डर लाग्नु पर्ने हो ? तर त्यस्तो भइरहेको छैन,’ उनले भने, ‘कुनै पनि मर्यादा कायम नराख्ने, एकले अर्कालाई गालीमात्रै गर्ने प्रवृत्ति छर्लंग छ । तर्क र तथ्य होइन, दम्भ देखाउनेहरूमात्रै छन् । यहीचरित्र मात्रै देखाएर अघि बढ्ने हो भने अनि चाहिँ यो व्यवस्थामाथि खतरा उत्पन्न हुन्छ ।’

नेता पौडेलले केपी ओली प्रवृत्तिबाट अहिलेको व्यवस्था र देशलाई जोखिम रहेको बताए । ‘पूर्वप्रधानमन्त्री केपी शर्माले फेरि पनि संसद्मा धेरै ठूलो अहंकर देखाइरहनुभएको छ, उहाँले यो देशमा कामै गर्न नपाउनुभएको होइन । उहाँले साढे तीन वर्ष देश चलाउने मौका पाउनुभएको हो । तर हामीलाई थाहै छ, यो अवधिमै अहिलेसम्मकै धेरै भ्रष्टाचार भयो,’ पौडेलले भने, ‘कुनै पनि आर्थिक अनियमितताका मुद्दामा छानबिन नै भएन । उहाँले कुनै छानबिन गर्नै चाहनुभएन । दुई तिहाईको शक्तिशाली सरकार, देशलाई केही पनि दिन नसकेर विवादै–विवादमा फसाएर बिदा भयो । त्यो सरकारलाई हामीले ढालेको होइन, उहाँको अहंकारले ढालेको हो ।’

उनले नेपालमा अस्थिरताको सबैभन्दा ठूलो कारक केपी ओली प्रवृत्ति भएको बताए । ‘जुन अहंकार उहाँसँग छ, त्यस्तो खालको अहंकार संस्कारमा रुपान्तरण भयो भने हामीले नेपालको लोकतन्त्रलाई विकसित गर्न सक्दैनौँ, यो नै नेपालको अस्थिरताको सबैभन्दा ठूलो कारक तत्व हो,’ उनले भने, ‘बारम्बार मौका पाएर पनि गर्न नसक्ने, अनि गफ मात्रै दिएर जतिसुकै काम गर्छु भनेपनि नागरिकमा कुनै आशा छाउँदैन । हामीले चाहेको सुशासन हो, भ्रष्टाचारको अन्त्य हो । तर, त्यो कसरी कायम गर्ने भन्ने विधि बनाउन कोही पनि तयार छैन । त्यसकाबारेमा छलफल नै गर्नु नपरे हुन्थ्यो भन्ने गरी मनोविज्ञान विकास भएको छ ।’