काठमाडौँ — भुक्तानी प्रणाली सञ्चालक, फोनपे पेमेन्ट सर्भिसले आईपीओ जारी गर्न पूर्वतयारी थालेको छ । यसका लागि फोनपे र एनएमबी क्यापिटलबीच परामर्श सेवासम्बन्धि सम्झौता भएको छ । एनएमबी क्यापिटलले फोनपेलाई आफ्नो विशेषज्ञता र क्षमताका आधारमा आईपीओ जारी गर्ने सम्बन्धमा परामर्श प्रदान गर्ने जनाएको छ ।

पूर्वतयारीको काम सकिएपछि नियामक निकायबाट स्वीकृति लिई फोनपेले सर्वसाधारणका लागि आईपीओे जारी गर्नेछ । फोनपे आईपीओ जारी गर्ने तयारीमा रहेको नेपालको पहिलो फिनटेक कम्पनी हो । फोनपेका प्रमुख कार्यकारी प्रमुख दिवस सापकोटाले एनएमबीसँगँको सम्झौताले आफूहरूलाई सहज हुने बताएका छन् । सन् २०१९ देखि सञ्चालनमा रहेको फोनपेले बैंक तथा वालेट प्रदायकका ग्राहकहरूलाई मोबाइल फोनमार्फत नगदरहित भुक्तानी सेवा दिँदै आएको छ ।

फोनपे नेटवर्कमा ५८ वटाभन्दा बढी बैंक तथा वित्तीय संस्था सदस्य छन् भने १ करोड ८० लाखभन्दा बढी सेवाग्राही र १२ लाख बढी मर्चेन्टहरू आवद्ध रहेको कम्पनीले जनाएको छ । 'दैनिक सात अर्बभन्दा बढीको नगदरहित कारोबारलाई सहजिकरण गरिरहेका छौं,' विज्ञप्तीमा भनिएको छ, 'एनएमबी बैंकको सहायक कम्पनी एनएमबी क्यापिटल, नेपाल धितोपत्र बोर्डद्वारा इजाजतपत्र प्राप्त संस्था हो । यसले मर्चेन्ट बैंकिङको सेवा दिइरहेको छ ।'