डेढ अर्ब लागतमा सेरामिक्स टायल्स उद्योग खुल्दै
काठमाडौँ — सिमरामा एक अर्ब ५० करोड रुपैयाँ लागतमा पशुपति सेरामिक्स उद्योग स्थापना गरिने भएको छ । गुणस्तरीय सेरामिक्स, भिट्रिफाइड, फ्लोर र वाल टायल्स उत्पादन गर्ने गरी ५० प्रतिशत संरचनाको कार्य सम्पन्न भइसकेको कम्पनीका सञ्चालक तुलसी साहले जनाए ।
कम्पनी भारतमा २५ वर्षदेखि सेरामिक्स उत्पादनमा ख्याति कमाएको अकुरीति एन्ड नमोको संयुक्त लगानीमा सञ्चालनमा आउन लागेको बताइएको छ । वार्षिक ५ अर्ब रुपैयाँ बराबरको उत्पादनको लक्ष्यसहित कम्पनी स्थापना गरिएको साहले जनाए । यो नेपालको सबैभन्दा ठूलो सेरामिक्स टायल्स कम्पनी हुने उनको दाबी छ ।
कम्पनीले सकेसम्म धेरै नेपाली कच्चापदार्थ प्रयोग गर्ने र आफना उत्पादनलाई विदेशमा समेत बिक्रीवितरणका लागि निर्यातसमेत गर्नेछ । कम्पनीले आफ्ना उत्पादन अक्टोबर २०२३ बाट बजारमा ल्याउने उद्योगले जनाएको छ ।
