भरतपुरमा भ्रष्टाचारविरुद्ध कार्टुन र कविता
चितवन — भ्रष्टाचारका समाचारहरू छताछुल्ल भएको र सरकार पनि कारबाहीमा जुट्न थालेका बेला भरतपुरमा चित्रकार र साहित्यकार पनि सडकमा उत्रिएका छन् । चौबिसकोठीमा बिहीबार कविले कविता सुनाए । चित्रकारले कार्टुन देखाए ।
नक्कली भुटानी शरणार्थी प्रकरणमा उच्च पदस्थ व्यक्तिहरूको नाम मुछिनुका साथै पक्राउ पनि पर्न सुरु भएको हुँदा यो प्रकरणमा दोषीलाई कारबाही हुनुपर्ने सर्जकहरूको माग छ ।
चितवनका चिनिएका कवि राजेन्द्र ‘घायल’ले आफ्नो रचना सुनाउँदा तालीको गड्गडाहटसँगै समर्थन गर्नेहरू प्रशस्तै थिए । उमेरले पाका कवि गोविन्दराज विनोदीले ‘आगो निभ्नु हुँदैन’ भन्दै जोसिलो कविता सुनाए ।
झन् अनीति बढ्यो, अत्याचारको शृङ्खला बढ्यो ।
भ्रष्टाचार बनी, तीखो शूल यो मुटुमा गढ्यो ।
विनोदीका कविताले यो शूल निकाल्ने सही बेला आएको र यो बेला शूल ननिकाले देश झनै मारमा पर्ने सन्देश दिएको थियो । चितवनका चित्रकार प्रकाश थापा ‘ट्रेलर’ र ‘फिलिम’ शीर्षकमा कोरेका ६ थान कार्टुन बोकेर कार्यक्रमस्थलमा पुगेका थिए । कार्यक्रममा ३३ जना स्रष्टाले आफ्ना रचनाहरू सुनाएको कार्यक्रमको संयोजन गरेका साहित्यकार भुपीन खड्काले जानकारी दिए ।
प्रकाशित : वैशाख २८, २०८० १९:३८
