कान्तिपुर वेबसाईट
AdvertisementAdvertisement
२५.१२°C काठमाडौं
काठमाडौंमा वायुको गुणस्तर: १३२

तस्बिरमा बुद्ध सम्पदा

कपिलवस्तु — बुद्धस्थलको पर्यटन प्रवर्द्धन गर्न प्राचीन दरबार परिसर तिलौराकोटमा ‘सम्पदामा तस्बिर’ प्रदर्शनी गरिएको छ । बुद्ध जयन्तीका उपलक्ष्यमा पुरातात्त्विक स्थल, भग्नावशेषको उत्खनन र संरक्षण, सांस्कृतिक परम्परा र रीतिरिवाज तथा ऐतिहासिक स्थलबाट देखिएका हिमालका आकर्षक तस्बिर प्रदर्शनीमा राखिएको हो ।

तस्बिरमा बुद्ध सम्पदा

भिक्षुको समूहद्वारा शान्तिका लागि प्रार्थना तथा भिक्षाटन गर्दाका तस्बिर पनि प्रदर्शनीमा राखिएको थियो ।

शाक्यवंशीय राजधानी प्राचीन कपिलवस्तु, जन्मस्थल लुम्बिनी, मावली देवदह र अस्तुधातु रहेको रामग्रामलाई मनमोहक र चित्ताकर्षक देखाउन २० फोटो प्रदर्शन गरिएको थियो । रात्रिकालीन दृश्य र ड्रोन फोटोग्राफी पनि प्रदर्शनीमा थियो । चिनियाँ पैदल यात्री ह्वेयङ साङ तिलौराकोट आउँदा लेखेको यात्रा विवरणमा उल्लेख भएजस्तै हिमालका तस्बिर देख्दा निकै आल्हादित भएको कृषिमन्त्री वेदुराम भुसालले बताए । ‘दरबार क्षेत्रबाट शुभ्र धौलागिरि हिमाल देख्दा खुसी भएँ,’ उनले भने, ‘तस्बिरले तिलौराकोटको मनमोहकतालाई थप उजागर गरेको छ ।’

लुम्बिनी विकास कोषको सहयोगमा गच्छामि मिडिया ग्रुपद्वारा आयोजित प्रदर्शनी कृषिमन्त्री भुसालले उद्घाटन गरेका हुन् । फोटो पत्रकार मनोज पौडेल र बृजेश जयसवालले खिचेका मन छुने र चित्ताकर्षक तस्बिर प्रदर्शनीमा राखिएको थियो ।

तिलौराकोटमा आयोजित फोटो प्रदर्शनी १ सय १० जना विदेशीसहित १ हजार पर्यटकले अवलोकन गरेको आयोजक गच्छामि मिडिया ग्रुपका अध्यक्ष मनोज श्रीवास्तवले बताए । पर्यटकीय गन्तव्य बन्न नसकेको तिलौराकोटलाई बेलाबेला यस्तै प्रदर्शनी गरेर यहाँको आकर्षण उजागर गर्ने योजना बनाएको उनले बताए ।

प्रकाशित : वैशाख २५, २०८० ०७:२९
प्रतिक्रिया
पठाउनुहोस्
जनताको राय

८ देशका लागि सिफारिस भएका राजदूतको नाम लाग्यो ?

x