कर्णालीमा मिस नेपाल अडिसन

यसबारे जानकारी दिन होटल सिद्धार्थमा शनिबार आयोजित पत्रकार सम्मेलनमा मिस नेपालको अन्तिम अडिसनमा सातै प्रदेशबाट प्रतिनिधित्व गराउने उद्देश्यले सबै प्रदेशमा अडिसन तय गरिएको हिडन ट्रेजरका अध्यक्ष दिवाकर राजकर्णिकारले बताए । उनका अनुसार अडिसनमा मिस नेपाल–२०२२ प्रियंकारानी जोशी, मिस नेपाल अर्थ सरिशा श्रेष्ठ र मिस नेपाल इन्टरनेसनल न्यान्सी खड्का उपस्थिति हुनेछन् । अडिसनका लागि आइतबार अभिमुखीकरण कार्यक्रमसमेत राखिएको छ । इटहरीदेखि सुरु भएको अडिसन वीरगन्ज, पोखरा र नेपागन्जमा सम्पन्न भइसकेको छ । पत्रकार सम्मेलनमा बोल्दै मिस नेपाल प्रियंकारानी जोशीले आगामी मिस वर्ल्डमा आफ्नो तयारीबारे अनुभवसमेत सुनाएकी थिइन् । ‘नेपाललाई अन्तर्राष्ट्रियस्तरमा चिनाउने राम्रो प्लेटफर्मका रूपमा मैले मिस नेपाललाई लिएको छु, मेरो उद्देश्य मिस वर्ल्डमा जानु हो,’ उनले भनिन् ।

मिस नेपाल–२०२२ प्रियंकारानी जोशीले कर्णाली चिनाउन पनि सुर्खेतमा अडिसन आयोजना गरिएको बताइन् । ‘यो यस्तो प्रतियोगिता हो जहाँ जित्नका लागि आए पनि सबै प्रतियोगी हार्न पनि तयार हुन्छन्,’ उनले भनिन्, ‘म उपाधि जित्नभन्दा पनि केही सिक्नका लागि गएकी थिए, तर उपाधि नै जिते ।’ उनले आफैंले आफैंलाई विश्वास गर्न सके उपाधि धेरै टाढा नभएको बताइन् । बिस्तारै ‘ग्ल्यामरस’ क्षेत्र नेपाली समाजले बुझ्दै गएको उनको भनाइ छ । मिस नेपालका सहभागीले प्रशिक्षणमा सिकेका कुरा लागू गर्न सके समाज परिवर्तन गर्न सक्ने ट्रेजरका अध्यक्ष दिवाकर राजकर्णिकारले बताए । ‘यो प्रतियोगिता ट्यालेन्सी, एक्पोजर र शिक्षा प्रस्तुत गर्ने इभेन्ट मात्र होइन,’ उनले भने, ‘यसले जस्तोसुकै अप्ठ्यारोलाई पनि ट्याकल गर्न सक्ने क्षमता विकसित गर्छ ।’