भारतीय प्रहरीद्वारा जलवायु अभियन्ता दिशा रवि पक्राउ
नयाँदिल्ली — भारतीय प्रहरीले बेंगालुरुकी २२ वर्षीया जलवायु अभियन्ता दिशा रविलाई पक्राउ गरेको छ । १७ वर्षीया स्वीडिस जलवायु अभियन्ता ग्रेटा थनवर्गले ट्विट गरेका कागजपत्र सम्पादन र वितरण गरेको आरोपमा दिशालाई पक्रेको हो ।
भारत सरकारले पाँच महिनाअघि ल्याएका तीनवटा कृषि विधेयक फिर्ता लिनुपर्ने माग राख्दै किसानहरुले गत डिसेम्बरदेखि जारी राखेको आन्दोलनको सेरोफेरोमा यही महिना थनवर्गले किसानहरुका समस्या समाधान गर्न सहज हुने र सचेतना फैलाउने भन्दै ‘टुलकिट’सहितको डकुमेन्ट ट्विट गरेकी थिइन् ।
प्रहरी स्रोतका अनुसार रविले थनबर्गको 'फ्राइडे फर फ्युचर' अभियानको भारतीय मोर्चा सम्हाल्दै आएकी छन् । आइतबार पक्राउ गरी दिल्ली हिरासतमा लिइएकी उनलाई सुनुवाइअघिसम्म पाँच दिन हिरासतमै राखिने भएको छ ।
महिनाको सुरुवातमै थनबर्गको टुलकिटले सरकारका विरुद्ध सांस्कृतिक द्वन्द्व निम्त्याउने र भारतीय समाजमा फाटो ल्याउने बताइएको थियो ।
प्रहरीले भने रविको मुद्दामा थनबर्गको मुद्दालाई जोडेको छैन ।
भारतीय विदेश मन्त्रालयले भारतीय किसान आन्दोलनलाई समर्थन गर्दै अन्तर्राष्ट्रिय स्तरबाटै सेलेब्रिटीहरुबाट सामाजिक सञ्जालमा अभिव्यक्ति आउन थालेपछि ‘यस्ता मुद्दामा विशेष गरी सेलेब्रिटीहरुले सामााजिक सञ्जालमा ह्यासट्याग वा टिप्पणी गर्न उद्यत हुनु गलत र गैरजिम्मेवारी हो,’ भन्दै विज्ञप्ति समेत निकालेकाे थियो ।
भारत सरकारले गत सेप्टेम्बरमा ल्याएका तीनवटा कृषि विधेयकको विरोधमा पाँच महिनादेखि विशेष गरी पन्जाब, हरियाणा, उत्तरप्रदेश, राजस्थान, महाराष्ट्र, पश्चिम बंगाल राज्यका किसान आन्दोलरत छन् । आन्दोलनलाई भारतभरका चालीसभन्दा बढी किसान संगठनको समर्थन छ । किसानहरुले दुई महिनायता दिल्लीका नाकाहरु गाजीपुर, सिंघु, टिक्रीलगायतमा धर्ना दिइरहेका छन् ।
प्रकाशित : फाल्गुन ३, २०७७ ०९:०१