आईपीएल २०२४ : गुजरातसँग राजस्थानको जित यात्रामा पूर्णविराम
जयपुर — लगातार खेल जितेर अंक तालिकाको शीर्षमा रहेको राजस्थान रोयल्स बुधबार आईपीएल २०२४ मा गुजरात टाइटन्सको हातबाट तीन विकेटले पराजित भएको छ । गुजरातको जित अन्तिम बलमा सम्भव भएको थियो ।
आभेस खानको बलमा रसिद खानले चौका प्रहार गर्दै गुजरातलाई सनसनीपूर्ण जित दिलाए । जितका लागि १ सय ९७ रन पछ्याएको गुजरातले सात विकेट गुमाएर १ सय ९९ रन बनाएको हो ।
रसिदले ११ बलमा २४ रन बनाए र नटआउट रहे । उनी ‘प्लेयर अफ द म्याच’ रहे । कप्तान शुभमन गिलले पनि ४४ बलमा ७२ रन जोडे । त्यस अगाडि राजस्थानले तीन विकेटमा १ सय ९६ रन बनाएको थियो ।
त्यसमा कप्तान सन्जु सामनसनले ६८ र रियान परागले ७६ रन बनाए । यो जितपछि गुजरातको छ अंक भएको छ । राजस्थानको भने आठ अंक छ र अझै शीर्ष स्थानमा छ ।
प्रकाशित : चैत्र २९, २०८० ०६:३६प्रतिक्रिया