कुपण्डोल टिमले जित्यो भेट्रानको उपाधि
काठमाडौँ — कुपण्डोल ४० प्लसले प्रथम कुसुन्ती ललितपुर मेयर कप भेट्रान फुटबल प्रतियोगिताको उपाधि जितेको छ । शनिबार फाइनलमा कुपण्डोलले फ्रिडम ‘ए’ लाई टाइब्रेकरमा ३–२ गोलले पराजित गर्यो । पेनाल्टीमा कुपण्डोलका नीलेन्द्र देवान, उज्ज्वल श्रेष्ठ र राजु तामाङले गोल गरे ।
फ्रिडम ‘ए’ का भगवान थापा र विकर्ण श्रेष्ठले गोल गरे भने राजनलाल नेपाली गोल गर्न असफल भए ।
जावलाखेल युथ क्लबको मैदानमा भएको फाइनलको निर्धारित ६० मिनेट समयको खेल २–२ गोलको बराबरीमा सकिएपछि सोझै पेनाल्टी शुटआउटमा गएको थियो । निर्धारित समयमा कुपण्डोलबाट राजु तामाङ र म्यान अफ द म्याच नीलेन्द्र देवानले क्रमशः २२ र ५६ औं मिनेटमा गोल गरे । फ्रिडम ‘ए’ का विकर्ण श्रेष्ठले ३१ औं र राजकुमार घिसिङले ५८ औं मिनेटमा गोल गरे । कुपण्डोलले १ लाख ७५ हजार र फ्रिडम ‘ए’ ले ७५ हजार रुपैयाँ पुरस्कार पाए ।
कुसुन्ती युवा क्लब र ललितपुर महानगर वडा १३ द्वारा ललितपुर महानगरपालिको सहयोगमा आयोजित प्रतियोगितामा कुपण्डोलका राजु तामाङ सर्वोत्कृष्ट खेलाडी घोषित भए । कुपण्डोलकै सुनील महर्जन उत्कृष्ट डिफेन्डर तथा फ्रिडम ‘ए’ का मुकुन्द थापा उत्कृष्ट गोलरक्षक चुनिए । विजेतालाई ललितपुर महानगरपालिकाका मेयर चिरिबाबु महर्जन, टोखाका मेयर प्रकाश अधिकारी, ललितपुर महानगर १३ का अध्यक्ष गणेश केसी, कुसुन्ती युवा क्लबका अध्यक्ष नीरज खड्कालगायतले पुरस्कृत गरे ।
मेयर कप भेट्रान फुटबलका सर्वोत्कृष्ट खेलाडी राजु तामाङ ट्रफीसाथ
प्रकाशित : पुस २८, २०८० २१:४२