महाकालीमा बेपत्ता किशोरको शव भेटियो

दोधारा चाँदनी नगरपालिका-९ का १७ वर्षीय विष्णु सुनारको सोही नगरपालिकाको वडा नं. १० कुतियाकवर नजिकै नदी किनारमा शव भेटिएको जिल्ला प्रहरी कार्यालय कञ्चनपुरका डिएसपी उमेश जोशीले बताए ।

डिएसपी जोशीका अनुसार बेपत्ता भएको स्थानबाट साढे तीन किलोमिटर तल नदी किनारमा शव भेटिएको हो । शनिवार साँझ दोधारा चाँदनी नगरपालिका-९ ढकनाघाट नजिकै महाकालीमा पौडी खेल्ने क्रममा सुनार बेपत्ता भएका थिए ।

उनको खोजीका लागि सशस्त्र प्रहरीको गोताखोर टोली समेत परिचालन गरिएको थियो । यसका साथै स्थानीय र प्रहरीको टोली समेत खोजीमा जुटेको थियो ।