रुपन्देहीमा लाखौं मूल्य बराबरको पटका नष्ट

सोमबार प्रहरी परिसरमै पत्रकार सम्मेलन गरी बरामद पटका पानीमा डुबाएर निस्क्रिय पारी खाल्डोमा पुरिएको छ । एक हप्ताको अन्तरालमा १० लाख मूल्य बराबरका पटका नष्ट गरिएको जिल्ला प्रहरी प्रवक्ता डीएसपी सत्यनारायण थापाले बताए । उनले चाडपर्वमा पड्काउनका लागि प्रतिबन्धित पटका प्रत्येक वर्ष नेपाल भित्र्याइने भन्दै यसलाई प्रहरीले रोक्ने गरेको बताएका छन् ।

थपाका अनुसार विभिन्न क्षेत्रमा रहेका प्रहरी चौकीले आइतबार पटका बरामद गरेका थिए । जिल्ला प्रहरीले १ लाख १६ हजार, प्रहरी चौकी मेउडिहवाले १ लाख ४५ हजार ५ सय, प्रहरी चौकी मैनिहवाले ९१ हजार, इलाका प्रहरी मंगलापुरले ८३ हजार ४ सय १६, इलाका प्रहरी लुम्बिनी र मातहतले ८१ हजार बराबरको पटका बरामद गरेको हो ।

यस्तै, इलाका प्रहरी बेलहियाले ३५ हजार, इप्रका मर्चवारले २२ हजार पाँच सय, खैरेनीले २१ हजार, गुलरिया चौकीले १० हजार, कालीदहले १४ हजार र मर्यादपुरले ५० हजारको पटका बरामद गरेको जनाएका थिए ।