तिलोत्तमामा आँखा उपचार केन्द्र
तिलोत्तमा — तिलोत्तमा–२ स्थित शंकरनगरमा आँखा उपचार केन्द्रको स्थापना गरिएको छ । नेपाल नेत्र ज्योति संघ, लुम्बिनी नेत्र विज्ञान अध्ययन संस्थान तथा रिसर्च सेन्टर, श्री रण अम्बिका शाह आँखा अस्पतालको व्यवस्थापन र तिलोत्तमा नगरपालिकाको सहयोगमा आँखा उपचार केन्द्रको स्थापना गरिएको हो ।
केन्द्रको शुक्रबार एक कार्यक्रमबीच तिलोत्तमा नगरपालिकाका प्रमुख बासुदेव घिमिरेले उद्घाटन गरे । नगरप्रमुख घिमिरेले आँखा उपचार केन्द्र स्थापनाले यस क्षेत्रका बिरामी लाभान्वित हुने विश्वास व्यक्त गरे । घिमिरेले तिलोत्तमामा स्थापना गरिएको आँखा उपचार केन्द्रलाई जिल्लाकै नमूना आँखा उपचार केन्द्र बनाउन नगरपालिकाले सदैव सहयोग गर्ने प्रतिबद्धता व्यक्त गरे ।
अस्पताल व्यवस्थापन समितिका अध्यक्ष सागरप्रताप राणाले अस्पतालको कार्ययोजनाअनुसार तिलोत्तमा नगरपालिकामा आँखा उपचार केन्द्र स्थापना गरिएको बताए । उनले दृष्टिविहीन हुने समस्या निवारणमा अस्पताल लागिपरेको बताए ।
केन्द्र स्थापनाको अवसरमा एकदिने नि:शुल्क आँखा शिविरसमेत सम्पन्न भएको छ । शिविरमा नेत्र अधिकृत संजिव अधिकारी र सुशन नकर्मीको टोलीले बिरामीको आँखा परीक्षण गरेका थिए । शिविरमा २ सय ५० जना आँखा रोगीको परीक्षण गरिएको थियो ।
प्रकाशित : कार्तिक ५, २०७८ १९:३५