गुल्मीमा एम्बुलेन्स चालकमाथि कुटपिट, दुई जना पक्राउ- लुम्बिनी - कान्तिपुर समाचार

गुल्मीमा एम्बुलेन्स चालकमाथि कुटपिट, दुई जना पक्राउ

गगनशिला खड्का

गुल्मी — इस्मा गाउँपालिका–४ दोहली स्वास्थ्य चौकीमा कार्यरत एम्बुलेन्स चालक दानबहादुर पाण्डेयमाथि बुधबार राति कुटपिट भएको छ । कुटपिटको आरोपमा स्थानीय दुई युवालाई प्रहरीले पक्राउ गरेको छ ।

अस्पतालमा रहेका बिरामी घर पुर्‍याउन जाने क्रममा स्थानीय लीलबहादुर अछामी र सागर गुरुङ मिलेर कुटपिट गरेको घाइते पाण्डेयले बताए । प्रहरीका अनुसार कुटपिटबाट पाण्डेयको टाउको र खुट्टामा चोट लागेको छ भने दाँत झरेको छ ।

चालक पाण्डेयको तम्घास अस्पतालमा उपचार हुन नसकेपछि थप उपचारका लागि पाल्पाको प्रभासस्थित लुम्बिनी मेडिकल कलेजमा लगिएको प्रहरी नायब उपरीक्षक पुरुषोत्तम पाण्डेले जानकारी दिए ।

प्रकाशित : आश्विन ८, २०७८ २०:२९
प्रतिक्रिया
पठाउनुहोस्

‘सरकारले प्याडको भन्सार महसुल बढाएको छैन’

कान्तिपुर संवाददाता

काठमाडौँ — सरकारले स्यानिटरी प्याड आयातमा भन्सार महसुल नबढाएको प्रस्ट्याएको छ । स्यानिटरी प्याड आयातमा आर्थिक वर्ष २०६९/७० अघिदेखि लाग्दै आएको १५ प्रतिशत भन्सार महशुल आर्थिक ऐन २०७८ मा जस्ताको तस्तै कायम राखिएको अर्थमन्त्री जर्नादन शर्माको सचिवालयले शुक्रबार जारी गरेको विज्ञप्तिमा उल्लेख छ ।

‘वर्तमान सरकारले महसुल बढाएको भन्ने तथ्यहीन हल्लाहरुको भ्रममा नपर्न अनुरोध गर्दछौं,’ विज्ञप्तिमा भनिएको छ । सरकारले स्यानिटरी प्याड आयातमा भन्सार महसुल बढाएको भनी सामाजिक सञ्जाल र कतिपय सञ्चारमाध्यममार्फत फैलाइएको हल्लाप्रति मन्त्रालयको ध्यानाकर्षणसमेत भएको विज्ञप्तिमा उल्लेख छ ।

स्यानिटरी प्याड उत्पादन गर्ने स्वदेशी उद्योगमा प्रयोग हुने कच्चापदार्थ आयातमा लाग्दै आएको १० प्रतिशत भन्सार महशुल आधा घटाएर ५ प्रतिशत मात्र कायम गरिएको पनि विज्ञप्तिमा उल्लेख छ । आर्थिक वर्ष २०७८/७९ को प्रतिस्थापन विधेयकले स्वास्थ्य खोप, अक्सिजन ग्यास तथा स्यानिटरी प्याड उत्पादन गर्ने उद्योगलाई उत्पादन सुरु भएको मितिले तीन वर्षसम्म लाग्ने करमा शतप्रतिशत र त्यसपछिको दुई वर्षसम्म ५० प्रतिशत छुट हुने व्यवस्थासमेत गरेको छ ।

प्रकाशित : आश्विन ८, २०७८ २०:२४
पूरा पढ्नुहोस्
प्रतिक्रिया
पठाउनुहोस्
×