लुम्बिनी प्रदेशसभाको बैठक स्थगित- लुम्बिनी - कान्तिपुर समाचार

लुम्बिनी प्रदेशसभाको बैठक स्थगित

अमृता अनमोल

बुटवल — प्रमुख प्रतिपक्षी दल नेकपा एमालेले अवरोध गरेपछि लुम्बिनी प्रदेशसभाको बिहीबारको पहिलो बैठक स्थगित भएको छ । दिउँसो करिब १ बजेर ५० मिनटमा पहिलो बैठक सुरु भएलगत्तै एमाले सांसदहरुले नाराबाजी सुरु गरेका थिए ।

सूर्य चिह्नबाट चुनाव लडेका तर अहिले अन्य पार्टीमा गएपछि पार्टीले कारबाही गरेका दुई सांसदलाई सभामुखले पदमुक्त गरेको सूचना नदिएको विरोधमा एमाले विरोधमा उत्रिएको हो ।

एमाले सांसद नाराबाजीमा उत्रेपछि सभामुख पूर्णबहादुर घर्तीले बैठक एक घण्टाका लागि स्थगित भएको सूचना सुनाएका थिए । तर अझैसम्म बैठक सुरु भएको छैन । प्रदेश‍सभाका प्रवक्ता रमेश गौतमले दलहरु आन्तरिक बैठकमा रहेकाले बैठक सुरु नभएको बताए ।

गठबन्धन सरकारले नया नीति कार्यक्रम र बजेट ल्याउने तयारीका साथ संसद् बैठक बोलाएको थियो । बिहीबारको बैठकमा जनता समाजवादी पाटीबाट नवनियुक्त सांसद निर्मला मुठभरी भट्राई र नेकपा समाजवादी रोजेकी रमा घर्तीबारेमा सूचना सुनाउने तथा केही विधेयक प्रस्तुत गर्ने कार्यसूची रहेको थियो ।

एमाले प्रमुख सचेतक भूमिश्वर ढकालले सत्तापक्षले छलफल गरे पनि एमालेले कारबाही गरेका दुई सांसद निलम्बनको सूचना नल्याएसम्म बैठक चल्न नदिने बताए । यस अघि प्रदेशसभा बैठक तीन पटक स्थगित भइसकेको छ । बुधबारका लागि बोलाइएको बैठक पनि स्थगित भएको थियो ।

प्रकाशित : भाद्र ३१, २०७८ १५:५६
प्रतिक्रिया
पठाउनुहोस्

एमालेको शक्ति घटेको छैन : ओली

कान्तिपुर संवाददाता

काठमाडौँ — एमाले अध्यक्ष केपी ओलीले एमालेको भूमिकामात्रै परिवर्तन भएको तर शक्ति कम नभएको दाबी गरेका छन् । उनले एमालेको संगठनमा पनि केही फेरबदल नआएको बताए ।

‘नेकपा एमालेलाई सिध्याउन खोजिएको थियो, तर सचेत कार्यकर्ता पंक्ति जुरुक्कै उठ्यो । र, पार्टी भत्काउन दिँदैनौँ । मास्न दिँदैनौँ भनेर रक्षामा उभियो । र, आज पार्टी ज्युँकात्युँ जस्ताको त्यस्तै खडा हुन सफल भयो,’ नेकपा एमाले काठमाडौंले गरेको कार्यक्रममा बिहीबार ओलीले भने, ‘नेकपा एमालेको भूमिका परिवर्तन भयो तर शक्ति परिवर्तन भएको छैन । हाम्रो उद्देश्य परिवर्तन भएको छैन । नीतिहरु परिवर्तन भएको छैन । हाम्रो संगठनमा पनि केही परिवर्तन भएको छैन । दुई चार.......(नराम्रो नभन्नु है भन्छन् सबैले फेरि)...सडेका तत्वहरु, बिग्रेका तत्वहरु पार्टीबाट गएभन्दा गाली गरेको जस्तो हुन्छ । बिग्रन बिग्रन खोजेका भनौँ कि क्या हो ? भयो त्यति । पार्टी जहाँको त्यही छ ।’

अध्यक्ष ओलीले पुष्पकमल दाहाललाई एकीकृत पार्टी, ठूलो पार्टी नपचेको टिप्पणी गरे । उनले नेकपा माओवादी केन्द्रका नेता कार्यकर्ताले एकीकृत पार्टी नै रुचाएकाले अब दाहाल गुटमात्रै अलग भएको बताए ।

‘नेकपा माओवादी केन्द्रका त्यो पृष्ठभूमिका साथीहरुको ठूलै हिस्सा एकता तोड्न मानेन, र पार्टीमै रह्यो । पार्टी एकीकरणकै पक्षमा रह्यो । एकीकृत पार्टीकै रुपमा रामबहादुर थापाजी यही हुनुहुन्छ, टोपबहादुर रायमाझीजी, लेखराज भट्टजी लगायतका साथीहरु, यही रहनुभयो । र माओवादी केन्द्र । नाम त छ । तर अब त्यो माओवादी केन्द्र होइन, त्यो प्रचण्ड गुटमात्रै हो,’ ओलीले भने, ‘राजनीतिक रुपले त्यो पार्टी यो पार्टीमा मिलिसक्यो । अब माओवादी केन्द्र त्यसले नाम पाउनु बेग्लै कुरा हो, तर प्रचण्ड गुट अलग भएको हो । नेकपा एमाले जस्ताको त्यस्तै छ ।’

प्रकाशित : भाद्र ३१, २०७८ १५:३९
पूरा पढ्नुहोस्
प्रतिक्रिया
पठाउनुहोस्
×