बेलिब्रिज बनाइएपछि बुटवल–बर्दघाट खण्डमा २१ दिनपछि यातायात सञ्चालन- लुम्बिनी - कान्तिपुर समाचार

बेलिब्रिज बनाइएपछि बुटवल–बर्दघाट खण्डमा २१ दिनपछि यातायात सञ्चालन

नवीन पौडेल

परासी — पूर्व–पश्चिम राजमार्गअन्तर्गत पश्चिम नवलपरासीको तुरिया खोलामा बेलिब्रिज निर्माण गरिएपछि २१ दिनदेखि अवरुद्ध सडक खुलेको छ । भदौ १० गतेको बाढीले पुल भासिँदा बुटवल–बर्दघाट सडकखण्डमा यातायात सञ्चालन हुन सकेको थिएन ।

मुख्य राजमार्ग अवरुद्ध भएपछि यात्रुले वैकल्पिक मार्ग प्रयोग गर्नुपर्ने अवस्था थियो । २० टनसम्म भार भएका सवारीसाधनलाई मात्र एकपटकमा एउटा सवारीसाधन पार गर्ने गरी आउजाउ गर्न दिइएको सडक डिभिजन कार्यालय बुटवलका प्रमुख जयलाल मरासिनीले बताए ।

ठूला मालवाहक सवारीसाधनलाई भने भुमही–भैरहवा सडकखण्ड प्रयोग गर्न भनिएको छ । आकस्मिक रूपमा बेलिब्रिज निर्माण गरिएकाले यसको लागत तत्कालै उपलब्ध नभएको सडक डिभिजन कार्यालय बुटवलले जनाएको छ ।

पुल भासिएपछि बर्दघाटबाट बुटवल पुग्न भुमहीबाट भैरहवा हुँदै जानुपर्ने बाध्यता थियो ।

प्रकाशित : भाद्र ३१, २०७८ १०:५५
प्रतिक्रिया
पठाउनुहोस्

मानव बेचबिखन तथा ओसारपसार नियन्त्रणमा कैलाली प्रहरी सर्वोत्कृष्ट 

अर्जुन शाह

धनगढी — मानव बेचबिखन तथा ओसारपसार नियन्त्रण कार्यमा कैलाली जिल्ला प्रहरी कार्यालय सर्वोत्कृष्ट भएको छ । महिला, बालबालिका तथा जेष्ठ नागरिक मन्त्रालयले सर्वोत्कृष्ट छनोट भएको उक्त कार्यालयलाई बुधबार एक कार्यक्रमकाबीच पुरस्कारसहित कैलालीका प्रहरी प्रमुख एसपी विश्व अधिकारीलाई  सम्मानित गरेको छ । 

१५ औं मानब बेचबिखन तथा ओसारपसार नियन्त्रण राष्ट्रिय दिवसको अवसरमा जिल्ला प्रहरी कार्यालय कैलालीलाई मन्त्रालयले सर्वोत्कृष्ट जिल्ला घोषणा गरेको थियो । कैलाली प्रहरीले विगत एक वर्षमा मानव बेचबिखन तथा ओसारपसार कसुरमा १६ घटनामा २६ जनालाई पक्राउ गरी मुद्दा चलाएको कार्यालयले जनाएको छ । १६ वटा मुद्दामध्ये ९ वटामा मानब बेचबिखनका साथै जबर्जस्ती करणीमा समेत चलाएको थियो ।

साथै सोही अवधिमा सहयोगी संस्था तथा भारतीय प्रहरीको सहयोग र समन्वयमा १४ वर्षीय बालिकालाई भारतको बैंगलोरबाट उद्धार गरी पारिवारिक पुनर्मिलन गराउन सफल भएको थियो ।

कैलाली प्रहरीको तथ्यांकअनुसार एक वर्षको अवधिमा ८६ महिला, २ बालक र ३८ बालिका गरी १२६ जनालाई सीमा नाकाबाट उद्धार गरी परिवारमा फर्काउन सफल भएको थियो । साथै, ३ महिला, १७ बालक र १० बालिका गरी ३० जनालाई बेवारिसे तथा अलपत्र अवस्थामा फेला पारी उनीहरुलाई उद्धार तथा पारिवारिक पुनर्मिलन गराइएको एसपी अधिकारीले बताए ।

जिल्ला प्रहरी कार्यालयले मानव बेचबिखन तथा ओसारपसार नियन्त्रणका लागि समुदाय प्रहरी साझेदारीमा विभिन्न जनचेतनामूलक कार्यक्रमहरु गर्दै आएको जनाएको छ ।


प्रकाशित : भाद्र ३१, २०७८ १०:४५
पूरा पढ्नुहोस्
प्रतिक्रिया
पठाउनुहोस्
×