ठेकेदारको विवादले सडक अधुरै- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

ठेकेदारको विवादले सडक अधुरै

काशीराम डाँगी

रोल्पा — ठेकेदारबीच नै विवाद हुँदा रोल्पाको सदरमुकाम लिबाङदेखि जलजलासम्मको सडक निर्माणमा ढिलाइ भएको छ । मुख्य ठेकेदारले भुक्तानी नदिएको पेटी ठेकेदारले जनाएका हुन् । आर्थिक वर्ष २०७३/०७४ मा सम्झौता भएको उक्त सडकको काम तीन वर्षभित्र सक्ने योजना थियो । तर गत असोजसम्म म्याद थपिए पनि सडकको काम नसकिएको हो । 

३७ किलोमिटर लामो उक्त सडक निर्माण गर्न रौताह/हरिहरि जेभी निर्माण कम्पनीले ठेक्का लिएको हो । तर, उक्त कम्पनीले रोल्पामा आफैं आएर काम गरेन । रोल्पाका तीन जना ठेकेदारसँग सम्झौता गरेर तोकिएकै अवधिमा निर्माण गर्न जिम्मेवारी दियो । ‘हामीले रोल्पाकै ठेकेदारहरू डम्बर बाँठा, लालबहादुर घर्तीमगर र तुलबहादुर खड्कालाई जिम्मा दिएका हौं,’ हरिहरि निर्माण सेवाका हरि राउतले भने । उनले सम्झौताबमोजिम ८० प्रतिशत काम सम्पन्न भइसकेको दाबी गरे । पछि खड्काले छाडेपछि अर्का ठेकेदार खटकबहादुर खत्री तोराबोरा मिसिएका थिए ।

ठेकेदार तोराबोराले हरिहरि निर्माण सेवासँग गरिएको सम्झौता अनुसार आफूहरूले सडक निर्माण गरेको बताए । ‘सम्झौता अनुसार हामीले काम गरेका छौं,’ उनले भने, ‘हामीलाई कम्पनीले ९५ लाख नगद दिन बाँकी छ । त्यो रकम पाउन मुद्दा दर्ता गर्ने तयारीमा छौं ।’ सहमतिअनुसार उक्त कम्पनीले गत चैत १५ गतेभित्र उक्त रकम दिने लिखित प्रतिबद्धता जनाएको खत्रीको दाबी छ । २८.४ किलोमिटर सडक निर्माण गरिएको खत्रीले बताए । ‘सहमतिअनुसार रकम दिएको भए ३७ किमी नै निर्माण गरिसक्ने थियौं,’ उनले भने ।

सडक निर्माणमा हालसम्म ३५ करोड बजेट खर्च भइसकेको छ । सुरु सम्झौताको अवधि सकिएपछि पुनः ६ महिना म्याद थप्दा पनि काम पूरा नभएको सम्झौता गर्ने कार्यालय प्यूठानस्थित सडक डिभिजन कार्यालयले जनाएको छ । उक्त साइट हेर्ने सडक डिभिजन कार्यालयका इन्जिनियर हेमन्त रोकाले पटकपटक ताकेता गर्दा पनि सडक निर्माण कार्य सम्पन्न नभएको बताए । निर्माण व्यवसायी संघ रोल्पाका अध्यक्षसमेत रहेका १० नम्बर वडाका अध्यक्ष मानबहादुर खत्रीले मुख्य ठेकेदारले अन्य ‘पेटी ठेकेदार’ लाई काम दिँदा ढिलाइ भएको बताए । ‘निर्माणको जिम्मा लिएको मुख्य ठेकेदारले अन्यलाई दिँदा काम सही ढंगले र समयमै हुन सक्ने सम्भावना कम हुन्छ,’ उनले भने ।

प्रमुख जिल्ला अधिकारी नवराज सापकोटाले उक्त सडक निर्माणबारे गुनासो प्राप्त भएको बताए । ‘योजना अनुसार काम भए नभएको निरीक्षण गर्न अनुरोध आएको छ । हामी अनुगमन गर्ने पक्षमा छौं,’ उनले भने । रोल्पा नगरपालिकाको १० नम्बर वडा र धार्मिक स्थल जलजलालाई लिबाङसँग जोड्न सडक निर्माण गर्न लागिएको हो । वर्षमा तीनपटक पूजाआजा गरिने जलजलामा लिबाङबाट पुग्न उक्त सडक सबैभन्दा छोटो हो । सरकारले चासो दिएर उक्त सडक निर्माण गर्ने योजना अघि सारे पनि ठेकेदार कम्पनीका कारण ढिलाइ भएको हो । सडक निर्माण भई सञ्चालनमा आएमा जिल्लाको धार्मिक एवं आर्थिक रूपमा प्रगति हुने अपेक्षा गरिएको छ ।

प्रकाशित : भाद्र ९, २०७८ १०:३२
प्रतिक्रिया
पठाउनुहोस्

जनशक्ति नहुँदा संक्रमितको उपचार प्रभावित

प्रदेश सरकारले निर्णय नगर्दा अस्पतालको स्तरवृद्धि र सेवा विस्तार अन्योलमा
काशीराम डाँगी

रोल्पा — जनशक्ति अभावमा रोल्पा अस्पतालमा कोभिड बिरामीको उपचार प्रभावित भएको छ । प्रदेश सरकारले अस्पतालको स्तरवृद्धिका लागि पर्याप्त दरबन्दी र कर्मचारी पठाउन नसक्दा सेवा प्रभावित भएको हो । 

प्रदेश सरकार मातहतको उक्त अस्पतालमा दैनिक कोभिडका बिरामी आउने गरेका छन् । थोरै जनशक्तिका भरमा कोभिड र गैरकोभिड बिरामीको उपचार गर्न स्वास्थ्यकर्मी बिदामा नबसी दिनरात खट्दा पनि समस्या आएको छ । अस्पतालका अनुसार सीमित जनशक्तिकै भरमा अस्पतालमा आउने र आइसोलेसनमा रहेका बिरामीको समेत उपचार गर्ने व्यवस्था मिलाइएको छ । अस्पतालकी निमित्त मेडिकल सुपरिटेन्डेन्ट डा. सबु काफ्लेले प्रदेश सरकारको अस्पतालको सेवा र स्तर वृद्धिको घोषणा र कार्यक्रमअनुसार कार्यान्वयन गर्न चुनौती भइरहेको बताइन् । ‘प्रदेश सरकारले रोल्पा अस्पतालको स्तर वृद्धि र सेवा विस्तार गरिएको प्रारम्भिक कार्यक्रम र बजेट पठाएपछि हामीले त्यसै अनुसार सेवा विस्तार थाल्यौं,’ उनले भनिन्, ‘तर, सेवा र स्तर वृद्धि गरिएको अन्तिम पत्र र निर्णय नआएको हुँदा थालिएका कार्यक्रम सम्पन्न गर्न मुस्किल भएको छ ।’

लुम्बिनी प्रदेश सरकारका तत्कालीन स्वास्थ्य मन्त्री सुदर्शन बरालले दुर्गममा रहेका अस्पतालको स्तर वृद्धि गरेको र त्यसै अनुसारको जनशक्ति पठाउन कार्यक्रम अघि सारेका थिए । त्यसै अनुसार रोल्पा अस्पतालमा बजेट र केही जनशक्ति पनि प्राप्त भएको हो । तर, हाल प्रदेश सरकारले अस्पतालको स्तर वृद्धिबारेको पछिल्लो निर्णय र अवस्थाबारे कुनै जानकारी पठाएको छैन ।

अस्पतालकी निमित्त मेडिकल सुपरिटेन्डेन्ट डा. काफ्लेका अनुसार प्रदेश सरकारले पठाएको बजेटअनुसार ४६ जना कर्मचारीको दरबन्दी कायम गरी परिपूर्ति गर्नुपर्नेमा हाल २२ जनालाई नियुक्ति दिइसकिएको छ । ‘सेवा थपिंदै गएको छ । तर, जनशक्ति अभाव छ । कोभिडका बिरामीलाई उपचार गर्न झन् जनशक्ति अभाव भएको छ,’ डा. काफ्लेले भनिन् । उनका अनुसार चिकित्सकसहित अझै २४ जना कर्मचारी परिपूर्ति गर्नुपर्नेछ । प्रदेश सरकारको पहलमा यसअघि अस्पतालमा थेरापी, आँखा र ल्याबसम्बन्धी सेवा विस्तार गरिएको छ । अस्पतालमा कार्यरत चिकित्सकमध्ये केहीलाई रोल्पा नगरपालिकाले पनि प्रोत्साहन भत्ता दिंदै आएको छ । यसअघि अस्पतालमा नगरले करिब १४ लाखको ठूलो क्षमताको जेनेरेटर प्रदान गरेको थियो । अस्पतालका सूचना अधिकारी कुलबहादुर डाँगीले सेवा क्षेत्रका हिसाबले स्थानीय तहमा रहेको अस्पतालका लागि पर्याप्त दरबन्दी सिर्जना गर्ने र आर्थिक लगायतका सहयोग गर्न पदाधिकारीले कन्जुस्याइँ गर्न नहुने बताए ।

अस्पताल र नगरले सञ्चालन गरेका आइसोलेसनमा समेत अस्पतालले स्वास्थ्यकर्मी खटाएको छ । नगरले अस्पतालमा खटाएका तीन जना स्वास्थ्यकर्मी फिर्ता बोलाएपछि झन् समस्या देखिएको छ । तर, यसबारे नगरपालिकाका प्रमुख प्रशासकीय अधिकृत मोहन पौडेलले अन्य स्वास्थ्य इकाइमा आवश्यक परेकाले उनीहरूलाई फिर्ता बोलाइएको बताए । ‘फेरि अस्पतालमा आवश्यक परेमा करारमा नियुक्त गरिएका स्वास्थ्यकर्मी पठाउन नसकिने होइन,’ पौडेलले भने । यसअघि नगरले १० नम्बर वडामा कार्यरत स्वास्थ्यकर्मीलाई फिर्ता बोलाएपछि पनि विवाद भएको थियो । खासगरी अस्पताललाई प्रादेशिक घोषित गरिएपछि स्थानीय तह र अस्पताल व्यवस्थापन समितिबीच सहयोगी सम्बन्ध बन्न सकेको छैन । केही वर्षअघिसम्म अस्पताल व्यवस्थापन समितिको अध्यक्ष सम्बन्धित स्थानीय तहको प्रमुख रहने प्रावधान भएकामा प्रदेश सरकारले अध्यक्ष हुन कम्तीमा स्नातक उत्तीर्ण गरेको र १० वर्ष सामाजिक क्षेत्रमा योगदान गरेको योग्यता हुनुपर्ने नयाँ ऐन ल्याएको छ । तर, रोल्पा अस्पतालका अध्यक्ष भने माओवादी केन्द्रका नगर प्रमुख फविन्द्र आचार्य नै छन् ।

केही स्वास्थ्यकर्मी नगरले फिर्ता गरेको बारे अस्पतालकी मेसु डा. काफ्लेले नगर प्रमुख पूर्ण केसीसँग छलफल भइरहेको बताइन् । नगर प्रमुख केसीले आवश्यक परेमा अन्य कर्मचारी र स्वास्थ्यकर्मी पठाउन सकिने आश्वासन दिएको डा. काफ्लेले बताइन् । अस्पताल व्यवस्थापन समितिका अध्यक्ष आचार्यले नगरले थप सहयोग गरेमा अस्पतालको सेवा प्रवाहमा सहयोग पुग्ने बताए ।

प्रकाशित : श्रावण २८, २०७८ ११:५४
पूरा पढ्नुहोस्
प्रतिक्रिया
पठाउनुहोस्
×