नक्कली स्टिकरसहित दुई पक्राउ
भैरहवा — भैरहवास्थित सशस्त्र प्रहरी बल नेपाल बर्डर आउट पोष्ट डन्डाले नक्कली स्टिकरसहित दुई जनालाई पक्राउ गरेको छ । सशस्त्रको टोलीले आन्तरिक राजश्व विभागको २ लाख ४० हजार वटा नक्कली स्टिकरसहित उनीहरुलाई पक्राउ गरेको हो ।
पक्राउ पर्नेहरुमा सिद्धार्थनगर नपा–३ दरखसवा बस्ने २३ वर्षीय सहिद अन्सारी २४ वर्षीय अमानत अलीलाई पक्राउ गरेको हो । अलीको घरमा भाडा बस्दै आएका अन्सारीको कोठाबाट सशस्त्रले उक्त परिमाणको स्टिकरण बरामद गरेको हो ।
सशस्त्रका एसपी राजेश उप्रेतीले बरामद सामग्रीसहित उनीहरुलाई थप अनुसन्धान र कारबाहीका लागि बुटवलस्थित राजश्व अनुसन्धान कार्यालयमा बुझाइएको बताए ।
राजस्व कार्यालयको प्रारम्भिक अध्ययन अनुसार बरामद गरिएका ती स्टिकरबाट अन्तःशुल्क १ करोड ९४ लाख, भ्याट ३१ लाख, १० लाख आय कर गरी २ करोड ३५ लाख रुपैयाँभन्दा धेरै राजश्व छली हुन सक्ने देखिन्छ ।
स्टिकर ढुवानीका लागि प्रयोग गरिएको लु २ च २५० नम्बरको गाडीपनि बरामद गरी राजस्व कार्यालय बुझाइएको एसपी उप्रेतीले बताए ।
प्रकाशित : भाद्र ५, २०७८ १८:२३
