बर्दियामा नुहाउन गएका तीन बेपत्ता- लुम्बिनी - कान्तिपुर समाचार

बर्दियामा नुहाउन गएका तीन बेपत्ता

कमल पन्थी

बर्दिया — बर्दियामा नदी र खोलामा नुहाउन गएका तीनजना बेपत्ता भएका छन् । बेपत्ता हुनेमा गेरुवा गाउँपालिका ६ का १४ वर्षीय सञ्जीव विक र उनको ८ वर्षीया बहिनी दिलमाया छन् ।

उनीहरु कर्णाली नदीको सैजनाघाटमा नहुाउने क्रममा बेपत्ता भएको प्रहरी उपरीक्षक ईश्वर कार्कीले बताए । यसैगरी राजापुर-५ स्थित बूढी खोलामा नुहाउन गएकी २५ वर्षीया लालसा चौधरी पनि बेपत्ता भएकी छन् ।

तीन जनाको खोजीका लागि नेपाल प्रहरी, सशस्त्र प्रहरी बल र स्थानीयवासी लागिरहे पनि फेला परेका छैनन् । बिककी दाजुबहिनी शुक्रबार बिहान करिब ११ बजे नुहाउने क्रममा वेपत्ता भएका थिए । नदीमा बेपत्ता भएको जानकारी उनीहरुसँग गएका साथीले गराएपछि प्रहरी र स्थानीयले खोजी गरिरहेको प्रहरी उपरीक्षक कार्कीले बताए । खोजीमा तालिम प्राप्त पौडीवाज लागिरहेका छन् ।


प्रकाशित : श्रावण ९, २०७८ १६:१४
प्रतिक्रिया
पठाउनुहोस्

बाघको आक्रमणबाट बर्दियामा एक जनाको मृत्यु

कमल पन्थी

बर्दिया — बर्दियामा बाघको आक्रमणबाट एक जनाको मृत्यु भएको छ । जगंलमा दाउरा बटुल्न गएका मधुवन नगरपालिका–३ भगरैयाका ६७ वर्षीय चित्रबहादुर खत्रीको बाघको आक्रमणबाट मृत्यु भएको हो । उनको शव सम्झना सामुदायिक वनमा भेटिएको हो ।

नेपाल–भारत सीमाको अन्तर्राष्ट्रिय जैविक मार्गको सीमा स्तम्भ नम्बर ८३/८४ को दसगजानजिक खत्रीलाई बाघले आक्रमण गरेको भगरैयाका सशस्त्र प्रहरी निरीक्षक अस्मिन थापा मगरले बताए । सशस्त्र प्रहरी बल, नेपाल प्रहरी र स्थानीयवासीले खोजतलास गर्दा खत्रीको शव सोमबार दिउँसो ११ बजे शव फेला परेको मगरले जनाए ।

खत्रीको कम्मरदेखि माथिल्लो भागसम्मका शरीरको भाग बाघले खाएको खाता जैविक मार्ग अन्तर्गत रेन्जपोस्टका सहायक वन अधिकृत सन्तोष चौधरीले बताए । गत साउनयता यस ठाउँमा बाघले ७ जनाको ज्यान लिइसकेको छ ।

स्थानीय प्रशासनले यस क्षेत्रमा घाँस, दाउरा, चरिचरण, सागपात टिप्न नजान आग्रह गर्दै आएको छ । लुकिछिपी वन क्षेत्रमा प्रवेश गर्दा बाघले आक्रमण गर्ने क्रम रोकिएको छैन । गत साउनयता बर्दियामा बाघको आक्रमणबाट १२ जनाको ज्यान गएको छ ।

प्रकाशित : असार २१, २०७८ १२:४९
पूरा पढ्नुहोस्
प्रतिक्रिया
पठाउनुहोस्
×