दाङमा निषेधाज्ञा असार १ गतेसम्म

बुधबारदेखि बिहान ६ देखि १० बजेसम्म खाद्यान्नलगायत अन्य पसलहरु पनि खुल्न पाउने भएका छन् । यसअघि खाद्यान्न लगायतका अत्यावश्यकीय पसलमात्रै प्रत्येक दिन बिहान ६ देखि ८ बजेसम्म खुल्दै आएका थिए । बैठकले होटेल, रेस्टुरेन्टु, चिया पसल, फिल्म हल, जिमखाना, शैलुनलगायतका संवेदनशील व्यवसाय भने बन्द नै राख्ने निर्णय गरेको छ ।

यसैगरी बैंक तथा वित्तीय संस्थाहरु प्रत्येक दिन बिहान १० देखि २ बजेसम्म खुल्न दिने निर्णय भएको प्रमुख जिल्ला अधिकारी दीर्घनारायण पौडेलले बताए । यसअघि बैंक तथा वित्तीय संस्था पालोपालो गरी एक बैंक सातामा दुई दिनमात्रै १० देखि २ बजेसम्म खुल्दै आएका थिए ।

जिल्लामा वैशाख यतामात्रै ७ हजार १ सय ७८ जना कोरोना संक्रमित भएको र त्यसमध्ये ६ हजार ५ सय ६३ जना निको भैसकेको पौडेलले जानकारी दिए । अहिले ६ सय १५ सक्रिय संक्रमित रहेको उनले जानकारी दिए । हालसम्म जिल्लामा कोरोना संक्रमणका कारण १ सय ८९ जनाको मृत्यु भएको पौडेलले बताए ।