लुम्बिनी प्रदेशको बजेट अधिवेशन : विनियोजन विधेयकको सिद्धान्त र प्राथमिकताका विषयमा छलफल

छलफलमा सहभागी प्रदेश सभा सदस्यहरुले सरकार अहिलेको बजेट मानवीय हिसावले कोरोना नियन्त्रण र उपचारमा केन्द्रित हुनुपर्नेमा जोड दिए । कोरोनाको दोस्रोपछि तेस्रो भेरियन्ट पनि आउने कुरा बाहिर चलिरहेकोले सरकार त्यसका लागि तयार भएर बस्नुपर्ने र मानवीय क्षति कम हुनेतर्फ सचेत बनेर बजेट बनाउन उनीहरुले आग्रह गरे ।

कोरोना संक्रमणले आर्थिक क्षेत्र डामाडोल भएकाले त्यसलाई उकास्ने र रोजगारी गुमेकालाई रोजगारीमा जोड्ने बजेट ल्याउन समेत प्रदेश सभा सदस्यहरुले सुझाव दिए । छलफलमा बोल्दै प्रदेश सभा सदस्य विष्णु पन्थीले कोरोना, रोकथाम, नियन्त्रण र रोजगारीलाई संगसंगै जोडेर बजेटको सिद्धान्त र प्राथमिकता तोक्न आग्रह गरे । प्रदेश सभा सदस्य अष्टभुजा पाठकले कोरोना विरुद्ध मानवीय क्षति रोक्ने र कृषिबाट आर्थिक हैसियत बदल्ने बजेट ल्याउन सुझाव दिए ।

छलफलमा प्रदेश सभा सदस्य कमला विक, तारा जिसी, दिपा विक, रमा अर्याल, पुमति ढेंगा, दामा शर्मा, तुलसी चौधरी, विष्णु पन्थीलगायतले कोरोनाको जोखिम अहिलेपनि कायमै रहेकोले सरकार सचेत भएर तत्कालीन र दीर्घकालीन योजनाका साथ अघि बढ्नुपर्ने बताए । प्रदेश सभाका १४ जना सदस्यहरुले छलफलमा भाग लिएका थिए ।

छलफलपछि बोल्दै आर्थिक योजना मन्त्री बैजनाथ चौधरीले प्रदेश सरकारको आर्थिक वर्ष २०७८/०७९ को बजेट कोरोना नियन्त्रण र रोकथाममा केन्द्रित हुने बताए । कोरोनाले तहसनहस पारेको आर्थिक क्षेत्र उकास्ने, नया रोजगारी सिर्जना गर्नेमा पनि बजेटमा प्राथमिकता दिने उनले बताए । फजुल खर्च हुन नदिने तर, कृषि, उद्योग एवं पर्यटन क्षेत्रलाई समेत समेटेर आर्थिक विकासमा टेवा पुर्याउने खालको बजेट तयार गरेको मन्त्री चौधरीले जानकारी दिए ।

मन्त्री चौधरीले प्रदेशका जनतालाई कोरोनाको जोखिमबाट बचाउन प्रदेश सरकार प्रयासरत रहेको बताउादै प्रदेशका चारवटै कोरोना विशेष अस्पताललाई पूर्वाधार सम्पन्न बनाएको र जिल्ला जिल्लामा समेत कोरोना उपचार थालेको बताए ।