पाल्पामा आइतबार थप ४ जना कोरोना संक्रमितको मृत्यु- लुम्बिनी - कान्तिपुर समाचार

पाल्पामा आइतबार थप ४ जना कोरोना संक्रमितको मृत्यु

माधव अर्याल

पाल्पा — पाल्पा आइतबार दिनभर थप ४ जना कोरोना संक्रमितको मृत्यु भएको छ । अस्पतालहरु र होम आइसोलेसनमा उनीहरुको मृत्यु भएको हो । तीन जना पाल्पाका र एक जना कपिलवस्तुका संक्रमितको मृत्यु भएको हो ।

रामपुर अस्पतालको आइसोलेसनमा उपचाररत रामपुर नगरपालिका–७ की ४६ वर्षीया महिलाको मृत्यु भएको स्वास्थ्य कार्यालयका सूचना अधिकारी ओकप्रकाश पन्थीले जानकारी दिए । महिलाको लुम्बिनी मेडिकल कलेज तानसेनमा उपचार भएको थियो । गत वैशाख २३ गते कोरोना पुष्टि भएको हो । होम आइसोलेसनमा फर्केकी महिलाको २५ गतेदेखि स्वास्थ्यमा समस्या आएर रामपुर अस्पतालको आइसोलेसनमा उपचार गराउँदै आएको रामपुर अस्पतालका निमित्त मेडिकल सुपरिटेन्डेन्ट डा. विजय परियारले बताए ।

माथागढी गाउँपालिका–८ का ६१ वर्षीय पुरुषको उपचारका लागि सदरमुकाम ल्याउँदै गर्दा बाटोमा मृत्यु भएको छ । आइतबार बिहान स्वास्थ्यमा समस्या आएर सदरमुकामको अस्पतालमा ल्याउँदै गर्दा उनको सिद्धार्थ राजमार्ग अन्तर्गत खोरबारीमा मृत्यु भएको सूचना अधिकारी पन्थीले बताए । उनको शनिबार मात्र पोजेटिभ रिपोर्ट आएको थियो ।

तानसेन नगरपालिका–७ काजीपौवाकी ५९ वर्षीया महिलाको पनि आइतबार मृत्यु भएको छ । होम आइसोलेसनमा बस्दै आएकी महिलाको चार दिनअघि पोजेटिभ पुष्टि भएको वडाध्यक्ष मुक्तिराम जीसीले जानकारी दिए । उनको शव परिवारले आफै व्यवस्थापन गरेको उनले बताए ।

यस्तै, लुम्बिनी मेडिकल कलेजको आइसोलेसनमा उपचाररत कपिलवस्तु बाणगंगा नगरपालिका–८ की ६६ वर्षीया महिलाको मृत्यु भएको स्वास्थ्य कार्यालयलले जनाएको छ । पाल्पाका ६७ जना कोरोना संक्रमितले ज्यान गुमाइसकेका छन । दोस्रो लहरसँगै होम आइसोलेसनमा मृत्यु हुनेको संख्या पनि बढेको छ ।

प्रकाशित : जेष्ठ २, २०७८ १८:५८
प्रतिक्रिया
पठाउनुहोस्

सरकारको लापरबाहीले कोरोना संक्रमितहरुले ज्यान गुमाउनु पर्‍यो : सर्वोच्च बार

कान्तिपुर संवाददाता

काठमाडौँ — सर्वोच्च अदालत बार एसोसिएसनले सरकारको हेलचेक्र्याइँ र लापरबाहीका कारण कोरोना संक्रमितहरुले ज्यान गुमाउनुपरेको निष्कर्ष निकालेको छ । सर्वोच्च अदालत बार एसोसिएसनले आइतबार विज्ञप्ति जारी गरी सरकारले उच्च सतर्कता नअपनाएका कारण संक्रमितहरुको मृत्यु भएको निष्कर्ष निकालेको हो ।

‘महामारीको समयमा संविधान, कानुन र सर्वोच्च अदालतले प्रतिपादन गरेका गरेको सिद्धान्तको परिपालना नगरी सरकारले समयमा उच्च सतर्कता नअपनाएर लापरवाहीपूर्ण क्रियाकलाप गरेका कारण नागरिकले मृत्युवरण गरेकाले’ सर्वोच्च अदालत बारको विज्ञप्तिमा भनिएको छ, ‘महामारीको संक्रमणबाट हालसम्म ज्यान गुमाउन पुगेका ४ हजार ८ सय ५६ व्यक्तिमध्ये अधिकांश सरकारकै अकर्मण्यताका कारण मृत्युवरण गर्न बाध्य भएका छन् । यसको सम्पूर्ण जिम्मेवारी सरकारले लिनैपर्छ ।’

सर्वोच्च अदालत बार एसोसिएसन सर्वोच्च अदालतमा बहस पैरवी गर्ने कानुन व्यवसायीहरुको छाता संगठन हो ।

सर्वोच्च अदालत बारले तत्काल स्वास्थ्य संकटकाल घोषणा गरेर कोरोना महामारी नियन्त्रणका लागि विशेष कानुन जारी गर्न माग गरेको छ । उसले राज्यको सबै शक्ति कोरोना नियन्त्रण र रोकथामका लागि केन्द्रित गर्न अनि सहरी क्षेत्रमा र कतिपय ग्रामीण भेगमा अस्पताल निर्माणमा जोड दिएको छ ।

खोप अभियान प्रभावकारी बनाउन भन्दै सर्वोच्च बारले पहिलो चरणमा कोभिसिल्डको खोप लगाएर दोस्रो चरणमा लगाउन नपाएकाहरुका लागि खोप लगाउन माग गरेको छ । अनि खोपका लागि अन्तर्राष्ट्रिय समूदायसमक्ष पनि कूटनीतिक पहल गर्न सरकारको ध्यानाकर्षण गराएको छ ।

सर्वोच्च अदालत बार एसोसिएसनले हरेक अस्पतालमा अक्सिजनको व्यवस्थ गर्न भनेको छ । रेम्डेसिभिर इन्जेक्सन, खाद्यान्न लगायतका सामग्रीको कालोबजार गर्नेमाथि कडा कारवाही गर्न पनि सर्वोच्च अदालत बार एसोसिएसनको माग छ ।



प्रकाशित : जेष्ठ २, २०७८ १८:३१
पूरा पढ्नुहोस्
प्रतिक्रिया
पठाउनुहोस्
×