अस्पतालमा बिरामी खचाखच- लुम्बिनी - कान्तिपुर समाचार
कान्तिपुर वेबसाईट
AdvertisementAdvertisement

अस्पतालमा बिरामी खचाखच

ठाउँ नभएपछि आपत्कालीन कक्षमा र भुइँमा राखेर उपचार
कमल पन्थी

बर्दिया — कोरोना संक्रमितका लागि छुट्टै आइसोलेसन कक्ष र बेड अभाव खट्किएका बेला बर्दियाको जिल्ला अस्पताल बिरामीले भरिएको छ । गर्मी र प्रदूषण बढेपछि विभिन्न रोगीको संख्या बढेको हो ।

बर्दियाको जिल्ला अस्पतालमा उपचाररत बिरामी । तस्बिर : कमल पन्थी/कान्तिपुर

५० शय्याको अस्पतालका बेड भरिभराउ छन् । ठाउँ नभएपछि शनिबार आपत्कालीन कक्षमा समेत बिरामी खचाखच थिए । नयाँ बिरामी भर्ना गरेर उपचार गर्न समस्या भएको छ । छिमेकी जिल्ला बाँकेको नेपालगन्जस्थित अस्पतालमा संक्रमितले गर्दा बेड पाउन समस्या भएपछि यहाँ कोरोनाबाहेकका बिरामीको चाप एक्कासि बढेको बताइएको छ ।

चिकित्सकका अनुसार श्वासप्रश्वास, झाडापखाला, रक्तअल्पता, ज्वरोलगायत बिरामीले अस्पताल भरिएको छ । यसबाहेक पेट र टाउको दुख्ने, मधुमेह, रक्तचापलगायत समस्या भएका बिरामी पनि दिनहुँ बढिरहेका छन् । शुक्रबार तीनवटा शय्या थपेर बिरामीको उपचार गरिएको थियो । शनिबार पनि बिरामी थपिएपछि भुइँमा राखेर उपचार गर्नुपरेको अस्पतालले जनाएको छ । यहाँ अधिकांश बिरामी बर्दिया र केही बाँकेका छन् । दुर्घटनालगायत गम्भीर अवस्थामा आउने बिरामीलाई आपत्कालीन कक्षमा बेड थपेर उपचार गर्न थालिएको छ । यसरी नै बिरामी बढ्दै जाने हो भने थेग्न नसक्ने अस्पतालले जनाएको छ ।

मधुवन नगरपालिका–५ का रोशन खड्का शनिबार मधुमेह बढेपछि जिल्ला अस्पताल आए । विगतमा नेपालगन्ज पुगेर उपचार गराउँदै आएका उनले अहिले कोरोनाको त्रासले त्यहाँ जाने अवस्था नरहेको बताए । ‘राम्रो उपचार यहीं हुन्छ भने कोरोना महामारी फैलिएको नेपालगन्ज किन जाने भनेर यहाँ आएको हुँ,’ उनले भने । उनीजस्तै गुलरिया–१ की देवमाया सुनार पनि रक्तचाप र मधुमेहकी बिरामी हुन् । उनले रेडियो, टीभी र पत्रपत्रिकामा नेपालगन्जमा कोरोनाको त्रासले भयावह अवस्था भएको थाहा पाएपछि उपचारका लागि जिल्ला अस्पताल आएको बताइन् ।

बर्दिया जिल्ला अस्पतालका मेडिकल सुपरिटेन्डेन्ट (मेसु) डा. सुभाष पाण्डेयले बाँकेको कोहलपुर र नेपालगन्जका अस्पताल कोभिडका कारण भरिभराउ भएपछि रिफर गर्ने बिरामी पनि यहीं उपचार गराइरहेको बताए । जनशक्ति कम भए पनि चिकित्सकबाट उपचारमा कुनै कमी नभएको उनले दाबी गरे । जिल्ला अस्पतालमा तीन विशेषज्ञ चिकित्सकको दरबन्दी भए पनि अहिले एक जना मात्र कार्यरत छन् । मेडिकल अधिकृत आठ, नर्सिङ स्टाफ २१ जना कार्यरत रहेको अस्पतालले जनाएको छ । कतिपय बिरामीलाई अक्सिजन चढाएर राखिएको छ । अक्सिजन सिलिन्डर सकिनुअगावै नेपागन्जबाट मगाउने गरिएको मेसु पाण्डेयले जनाए । संक्रमण बढे पनि जिल्ला अस्पतालमा आउने बिरामीलाई जोखिम मोलेरै भए पनि उपचारमा कुनै कमी नगरेको चिकित्सकले जनाएका छन् ।

जिल्ला अस्पतालको बहिरंग सेवामा अहिले दैनिक २ सय ५० देखि ३ सयको हाराहारीमा बिरामी उपचारका लागि आउने गरेको मेडिकल अधिकृत मनु दहितले बताए । कोरोनाको जोखिम मोलेरै चिकित्सकले उपचार गरिरहेको उनले जनाए । बिरामीको संख्या बढ्दै गएपछि चिकित्सकले संक्रमण नफैलियोस् भन्दै सुरक्षित रूपमा उपचारमा लागेका छन् । माइकबाट बोलाएपछि टिकट काटेका बिरामी पालैपालो भित्र छिर्छन् । आईसीयू र भेन्टिलेटर नहुँदा जटिल बिरामी बाध्य भई थप उपचारका लागि बाहिर जानुपर्ने अवस्था छ । जिल्ला अस्पतालमा सिकलसेलको परीक्षण निःशुल्क व्यवस्था गरिएको छ ।

प्रकाशित : वैशाख ५, २०७८ ०९:३०
प्रतिक्रिया
पठाउनुहोस्

पानीजति हाइड्रोमा, खोलानदी सुक्खा

आनन्द गौतम

ताप्लेजुङ — पाँचथरको याङवरक गाउँपालिका थर्पुबाट ताप्लेजुङको पाथीभरा याङवरक गाउँपालिका थुम्बेदिन जाँदा काबेली नदीमा झोलुंगे पुल तर्नुपर्छ । पुल तरिरहँदा दुईवटा दृश्य देखिन्छ । पुलको पूर्वपट्टि ठूलो आवाज गर्दै काबेली छङछङ बगेर आएको छ भने पश्चिमपट्टि नदी पूरै सुक्खा छ । 

ताप्लेजुङ र पाँचथरको सिमाना भएर बग्ने काबेली नदी । हाइड्रो पावर कम्पनीले सबै पानी थुनेर विद्युत् उत्पादनमा लगाएपछि यस्तो अवस्था आएको हो । तस्बिर : आनन्द/कान्तिपुर

पाँचथरको हेवा खोलाको हालत पनि यस्तै छ । मेची राजमार्गमा यात्रा गर्नेहरूले पुलमुनि पानी नदेखेपछि उदेक मान्छन् । काबेली नदी र हेवा खोलामा पानी आफैं सुकेको भने होइन । विद्युत् उत्पादक कम्पनीले खोलाको पानी थुनेर सुरुङ (टनेल) मा हालेका कारण सुक्खा भएको हो ।

नियमअनुसार, १० प्रतिशत पानी खोलामै छोड्नुपर्छ । तर विद्युत् उत्पादक उक्त नियम ठाडै मिचिरहेका छन् । खोलो पूरै थुनेर सुरुङमा पानी सोझ्याएछन् । ताप्लेजुङको रैराङ खोलाको अवस्था पनि यस्तै छ । रैराङको पानी काबेलीमा ल्याएर मिसाइएको छ ।

रैराङवाट १० मेगावाट विद्युत् उत्पादन हुन्छ । रैराङ खोलाको पानी ल्याएर काबेली नदी छेउमा झारिएको छ । रैराङ र काबेली नदीको पानीलाई समेटेर सुरुङमार्फत पावर हाउसमा पुर्‍याएर २४ मेगावाट उत्पादन गरिएको छ । बर्खाको तुलनामा हिउँदमा भने उत्पादन ह्वात्तै घट्ने गरेको छ ।

पाँचथरको फिदिम नगरपालिका–४ र हिलिहाङ गाउँपालिका–७ को सिमाना भएर बग्ने हेवा र फेमे खोलाको पानीबाट २२ मेगावाट विद्युत् उत्पादन हुन्छ । माउन्टेन हाइड्रोपावर कम्पनीले तल्लो हेवा खोला जलविद्युत् आयोजना सञ्चालन गरेको छ ।

तर यता खोला, नदीकै पानीमा आश्रित भई हिउँदे खेती गर्दै आएका किसान भने जलविद्युत्का लागि सबै पानी टनेलमा सोझ्याएपछि चिन्तित छन् । स्थानीय दीपक माझीले भने, ‘खोलै सुकेपछि खेतमा सिँचाइ गर्ने उपाय पनि भएन ।’ गत वर्ष पनि हाइड्रो चलाउनेले यसै गरेको र विरोध गरेपछि थोरै मात्रामा पानी छोडेको उनले बताए ।

काबेली सुकेपछि अन्तिम दाहसंस्कारमा समेत समस्या परेको सिनामका रत्न थेवेले गुनासो पोखे, ‘पानी नभएको खोलामै किन लैजानु र जस्तो हुन्छ ।’ हाइड्रो पावरका सञ्चालक दीपेन्द्र आङ्बो खोलामा पानीको बहाव घटेकाले यस्तो भएको बताउँछन् । उनी अहिले खोलामा प्रतिसेकेन्ड तीन/चार सय लिटर मात्रै पानी भएको र त्यसको १० प्रतिशत पानी छोडेको दाबी गर्छन् । ‘दाहसंस्कार गर्ने समयमा आयोजना बन्द गरेर पनि पानी छोडेका छौं,’ आङ्बोले भने, ‘हाइड्रोले नियम उल्लंघन गरेको छैन, पानी घटेकै कारण यस्तो भएको हो ।’ तीन/चार सय लिटर पानी छोड्दा खोलामा नदेखिएको उनको दाबी छ ।

प्रकाशित : वैशाख ५, २०७८ ०९:२७
पूरा पढ्नुहोस्
प्रतिक्रिया
पठाउनुहोस्
×