सुनौली–बेलहिया नाका हुँदै नेपाल आउनेको अनिवार्य स्वास्थ्य जाँच गरिने
भैरहवा — भारतबाट सुनौली–बेलहिया नाका हुँदै नेपाल आउने नागरिकलाई सीमा नाकामा अनिवार्य स्वास्थ्य जाँच गरिने भएको छ ।
कोभिड–१९को संक्रमण रोकथाम तथा नियन्त्रणका लागि जिल्ला स्तरीय कोभिड–१९ संकट व्यवस्थापन केन्द्र रुपन्देहीको शनिबार भैरहवामा सम्पन्न बैठकले अनिवार्य स्वास्थ्य परीक्षण गर्ने निर्णय गरेको हो ।
स्वास्थ्य जाँच गर्दा शंकास्पद व्यक्तिको अनिवार्य एन्टिजेन परीक्षण पनि गरिने भएको छ । एन्टिजेन परीक्षणमा पोजेटिभ देखिएकालाई सम्बन्धित अस्पताल एवं आसोलेसन सेन्टरमा पठाइने छ ।
होल्डिङ सेन्टरमा भारतबाट आएका यात्रुलाई राखेर अनिवार्य स्वास्थ्य जाँच गरी शंकास्पद यात्रुको तत्काल ऐन्टिजेन परीक्षण गरिने प्रमुख जिल्ला अधिकारी अस्मान तामाङले बताए । सामान किनमेल गर्न र दैनिक कामकाजले आउजाउ गर्नेलाई हाल हेल्थ डेस्क रहेको स्थानबाट आवागमनको अनुमति दिइएको छ ।
कोभिड–१९को संक्रमण रोकथाम तथा नियन्त्रणका लागि रुपन्देहीमा बिना मास्क सार्वजनिक स्थानमा हिँडडुल गर्नमा रोक लगाइएको छ । बिना मास्क सार्वजनिक स्थानमा हिँडडुल गरेको र स्वास्थ्य मापदण्डको पालना नगर्नेलाई कारबाही समेत गर्ने निर्णय भएको छ । ‘यसका लागि सुरुमा हामीले ‘नो मास्क नो मुभमेन्ट’ अभियान सञ्चालन गर्ने छौं,’ प्रजिअ तामाङले भने, ‘कारबाही प्रक्रिया पनि सँगसँगै लैजानेछौं ।’
यस्तै,बैठकले रुपन्देहीमा सम्पूर्ण व्यवसाय रातको ९ बजेसम्म मात्र सञ्चालन गर्न दिने निर्णय गरेको छ ।
प्रकाशित : वैशाख ४, २०७८ १६:५५