बालिका बन्धक र जबर्जस्ती करणीका आरोपी कारागार चलान
रुकुम पूर्व — नौ दिनसम्म बालिका बन्धक बनाएर जबरजस्ती गरेको आरोपमा पक्राउ परेका युवकलाई कारागार चलान गरिएको छ ।
रुकुमकोट जिल्ला अदालतको निमित्त श्रेष्तेदार अमृताकुमारी रिजालको इजलासले २३ वर्षीय ती युवालाई पुर्पक्षका लागि कारागार पठाउन आदेश गरेको हो । थुनछेक आदेशलगत्तै ती युवालाई रुकुम पश्चिमस्थित कारागार पठाइएको अदालतका तहशिलदार रवि खड्काले बताए । युवासँगै पक्राउ परेका बालकलाई भने अभिभावकको जिम्मा लगाइएको छ । १४ वर्षभन्दा मुनिकै रहेकाले उनलाई अभिभावकको जिम्मा लगाउने आदेश भएको हो ।
गत चैत १ गते १४ र १५ वर्षकी दुई बालिकालाई अस्थायी सदरमुकाम रुकुमकोट बोलाएर जिल्ला अस्पतालको एउटा कोठामा बन्धक बनाएर जबरजस्ती करणी गरेको भन्दै प्रहरीले ती युवा र बालकलाई पक्राउ गरेको थियो । युवाकै कोठामा बाहिरबाट ताला लगाएको अवस्थामा ती दुई बालिकालाई प्रहरीले चैत ९ गते फेला पारेको थियो । दुवै बालिकाकी आमाले छोरीहरु हराएको भनेर प्रहरीमा निवेदन दिएपछि प्रहरी खोजतलासमा लागेको थियो । पछि तिनै युवाको कोठामा बालिकाहरु भेटिएपछि प्रहरीले उनका विरुद्ध अपहरण, शरीर बन्धक तथा जबजस्ती करणीको मुद्दा दर्ता गरेको थियो ।