साढे दुई वर्षपछि विद्युत् आयोजना फेरि सञ्‍चालनमा- लुम्बिनी - कान्तिपुर समाचार

साढे दुई वर्षपछि विद्युत् आयोजना फेरि सञ्‍चालनमा

हरि गौतम

रुकुम पूर्व — जिल्लाको एक विद्युत् आयोजना २९ महिनापछि पुन: सञ्‍चालन भएको छ । सिस्ने गाउँपालिका–८, स्थित जामाखोलाको लघु जलविद्युत् आयोजना साढे दुई वर्षमा पुन: सञ्‍चालन भएको हो । 

२०७२ माघ २६ गते निर्माण भएको यो आयोजनामा त्यसको ४ वर्षपछि २०७५ असोज ३० गतेको पहिरोले क्षति पुर्‍याएपछि बन्द भएको थियो । ९० किलोवाट क्षमताको यो आयोजनाबाट सिस्ने गाउँपालिका वडा नम्बर ७ र ८ तथा रुकुम पश्चिमको मुसीकोट नगरपालिका १ छिङका गरी ९ सय २६ घरमा उक्त विद्युत् जडान गरेका छन् ।

वैकल्पिक ऊर्जा प्रवर्द्धन केन्द्रको २ करोड १३ लाख र स्थानीयको श्रमदान गरी झन्डै ४ करोड रुपैयाँको लगानीमा उक्त आयोजना निर्माण भएको थियो । पहिरोले क्षति पुर्‍याएको आयोजना करिब आधा करोडको लागतमा पुनर्निर्माण गरेर सञ्‍चालन गरिएको हो । प्रतिनिधिसभा सदस्य कमला रोकाको पूर्वाधार क्षेत्र विकास कार्यक्रमबाट आएको ४९ लाख ९७ हजार १ सय ७२ रुपैयाँमा क्षतिग्रस्त विद्युत् आयोजनाको पुनर्निर्माण भएपछि पुन: घर घरमा बत्ती बलेको विद्युत् उपभोक्ता समिति अध्यक्ष बिर्खबहादुर बुढाले जानकारी दिए । लामो समयपछि बत्ती बाल्न पाएपछि उपभोक्ताहरु हर्षित भएका छन् ।

आइतबार विद्युत् गृहमा बलेको विद्युत् सोमबारदेखि सबैको घरमा बल्न थालेको छ ।

पुनर्निर्माणको क्रममा उक्त आयोजनामा फेरि पहिरो गएको थियो । यसले पनि आयोजना मर्मत गरी सञ्‍चालनमा ढिलाई भएको अध्यक्ष बुढाले बताए । उक्त आयोजना क्षतिग्रस्त बनेपछि सर्वसाधारण उपभोक्ताले नेपाल विद्युत् प्राधिकरणको केन्द्रीय प्रसारण लाइनको बिजुली बाल्दै आएका थिए । लामो समयको प्रयासपछि बिजुली बल्न थालेको गाउँपालिका उपाध्यक्ष गोवर्धन बुढाले बताए ।

प्रकाशित : फाल्गुन १८, २०७७ १६:३५
प्रतिक्रिया
पठाउनुहोस्

२४ घण्टामा नेपालमा ७८ जनामा कोरोना भाइरस संक्रमण पुष्टि

कान्तिपुर संवाददाता

काठमाडौँ — पछिल्लो २४ घण्टामा नेपालमा ७८ जनामा कोरोना भाइरस संक्रमण देखिएको छ । स्वास्थ्य मन्त्रालयका अनुसार मंगलबार मुलुकका विभिन्न प्रयोगशालामा गरिएको परीक्षणमा ७८ जनामा संक्रमण पुष्टि भएको हो ।

योसँगै नेपालमा कोरोना भाइरसबाट संक्रमित हुनेको संख्या २ लाख ७४ हजार २ सय ९४ पुगेको छ । नेपालमा ९ सय ७४ सक्रिय संक्रमित रहेका छन् ।

पछिल्लो २४ घण्टामा थप ७२ जना संक्रमणमुक्त भएका छन् । हालसम्म निको हुनेको संख्या २ लाख ७० हजार ५ सय ४३ रहेको छ । नेपालमा कोरोनाबाट मृत्यु हुनेको संख्या २ हजार ७ सय ७७ रहेको छ ।

हालसम्म देशभर २१ लाख ७० हजार १ सय १२ नमुनाको पीसीआर परीक्षण भएको छ । क्वारेन्टाइनमा ६२ जना रहेका छन् ।

प्रकाशित : फाल्गुन १८, २०७७ १६:०२
पूरा पढ्नुहोस्
प्रतिक्रिया
पठाउनुहोस्
×