पनौतीको चौकोटमा मानव कंकाल भेटियो

बिहीबार दिउँसो ३ बजेको समयमा चौकोटको जंगलमा स्थानीयहरूले घाँस–दाउरा काट्न जाने क्रममा नाम, थर, वतन नखुलेको पुरुषको जस्तो देखिने अस्थिपञ्जरसहित घडी, मोबाइल देखेपछि प्रहरीलाई खबर गरेको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक राजकुमार श्रेष्ठले जानकारी दिए ।

प्रहरीको टोलीले घटनास्थलमा पुगी मुचुल्का उठाएको थियो । फेला परेको मानव कंकाल पनौती नगरपालिका–६ बस्ने ५२ वर्षीय रामशरण हुमागाईंको हुन सक्ने आफन्तहरूले बताएको प्रहरी नायब उपरीक्षक श्रेष्ठले बताए ।

मृतकले लगाएको लुगा र घडीबाट पहिचान गरेको र रामशरण ६ महिना अगाडिदेखि हराएको भन्ने बुझिएको प्रहरीको भनाइ छ । उक्त विषयमा आवश्यक अनुसन्धान भइरहेको जिल्ला प्रहरी कार्यालय काभ्रेले जनाएको छ ।