नमोबुद्धमा २ लाख लिटरको खानेपानी ट्यांकी

उपभोक्ता समितिका अध्यक्ष मनोज अधिकारीका अनुसार संघीय सरकारको १५ करोड ४७ लाख ४३ हजार रुपैयाँ लागत्तमा निर्माण हुन लागेको हो । आयोजनाका लागि वडा ८ को पिपलटारमा दुई वटा इनार (सम्प वेल) निर्माण गरिएको छ । प्रतिसेकेन्ड ६ लिटर पानी संकलन हुने ठानिएको छ । सोही पानी लिफ्टिङ गरी १७ वटा ट्यांकीमा जम्मा पारेर वितरण गरिनेछ ।

अध्यक्ष अधिकारीका अनुसार उच्चकोटी/अमर/नवआदर्श जेभीले निर्माणको जिम्मा पाएको छ । गत मंसिरमा भएको सम्झौताअनुसार २०८१ मंसिरमा आयोजना सम्पन्न हुनेछ । साविक डराउनेपोखरी गाविसस्थित दाप्चा खानेपानी उपभोक्ता समिति (स्किम नं २), डराउनेपोखरी खानेपानी उपभोक्ता समिति (क) र (ख) एकिकृत गरी काशीखण्ड बृहत् खानेपानी आयोजना सञ्चालनमा ल्याएको उनले बताए । साविक आयोजनाका ३ वटा टंयाकीसमेत १७ वटा ट्यांकी निर्माण गरिएको उपभोक्ता समितिका सदस्य रामेश्वर अधिकारीले जानकारी दिए । नमोबुद्ध–८ मा बन्ने २ लाख लिटर क्षमताको ट्यांकी आइतबार शिलान्यास गरिएको छ । नगर प्रमुख कुनसाङ लामा, उपप्रमुख रत्नबहादुर लामा, वडा नं ८ का अध्यक्ष शेरबहादुर लामा, संघीय खानेपानी तथा ढल व्यवस्थापन आयोजनाका प्रमुख अतुलेश्वर कर्णलगायतले शिलान्यास गरेका हुन् । नगरप्रमुख लामाले यो नगरको गौरवको आयोजना भएकाले समय सीमामै सम्पन्न गरी जनताको घरदैलोमै गुणस्तरीय खानेपानी पुर्‍याउने प्रतिबद्धता व्यक्त गरे ।