भारतबाट बनेका पाँच भवनको एकैसाथ उद्घाटन
सिन्धुली — भारत सरकारको सहयोगमा निर्माण सम्पन्न पाँचवटा भवनको शनिबार एकैसाथ उद्घाटन गरिएको छ । भारतीय दूतावास मार्फत निर्माण भएका दुईवटा विद्यालय र तीनवटा स्वास्थ्य चौकी भवनको राजदूत नवीन श्रीवास्तवले कमलामाइ नगरपालिका वडा नं १ को चण्डेश्वरी माविमा आयोजित कार्यक्रममा एकसाथ उद्घाटन गरेका हुन् ।
चण्डेश्वरी माविको भवन १२ वर्षअघि नै निर्माण सम्पन्न भएको थियो । २ करोड ३१ लाखको लागतमा २ तले निर्माण सम्पन्न भएको भवनको शिलान्यास भारतीय राजदूतले २०६५ सालमा शिलान्यास गरेका थिए । २०६८ सालमा निर्माण सम्पन्न भएको भवनको उद्घाटन भने हुन सकेको थिएन ।
भर्खरै निर्माण सम्पन्न भएको तीनपाटन गाउँपालिका २ को भवानी माविको भवन चण्डेश्वरी माविमै व्यानर राखेर उद्घाटन गरिएको थियो । उक्त भवन चार करोड १९ लाखको लागतमा निर्माण सम्पन्न भएको जिल्ला समन्वय समितिले जनाएको छ । भवन १० वर्षमा बनेको हो । दूतावासबाट रकम निकासा ढिला भएकाले समय बढी लागेको जनाइएको छ । दुवै भवनको सिद्धबाबा कन्स्ट्रक्सन कम्पनीले निर्माणको ठेक्का पाएको थियो ।
उक्त क्षेत्रमा दुई करोड ११ लाखको लागतमा तीनवटा स्वास्थ्य चौकी निर्माण सम्पन्न भएका हुन् । सुनकोसी गाउँपालिकाको दुम्जा र गोलन्जोर गाउँपालिकाको बाशेश्वर र ग्वाल्टारमा स्वास्थ्यचौकी भवन बनेका छन् । उद्घाटन कार्यक्रम भारतीय राजदूत श्रीवास्तवले पाँचवटा भवन सम्पन्न गर्न ८ करोड खर्चिएको बताए । काममा भएको ढिलासुस्तीले रकम निकासा समेत ढिलो भएको राजदूत श्रीवास्तवको प्रष्टोक्ती थियो । काम जुन गतीमा हुन्छ, पैसा त्यहि गतीमा आउ“छ, उनले भने, ‘एउटा विद्यालय तीन वर्षमै बन्यो । अर्कोलाइ १० वर्ष लाग्यो ।’
राजदूत श्रीवास्तवले स्वास्थ्य र शिक्षाको क्षेत्रमा भारत–नेपाल मिलेर अघि बढे दुवै देशलाई फाइदा हुने बताए । विकास निर्माणमा गरेको सहयोगले भारत र नेपालको सदियौंदेखिको मित्रता अझ प्रगाढ भएर जाने उनको विश्वास थियो ।
नेपाल र भारत छिमेकी मुलुक मात्र नभएर भाइचाराको सम्बन्ध रहेको राजदूत श्रीवास्तवको भनाइ थियो । भारतीय दूतावासका विकास साझेदारी एवं पुनर्निर्माणका प्रथम सचिव करुण बंसलले जनताको जीवनस्तर उकास्ने कार्यक्रममा भारत सरकार सहयोग गर्न इच्छुक रहेको बताए । विद्यालय बस र स्वास्थ्यचौकीलाई एम्बुलेन्स माग भएमा सहयोग गर्ने उनले जनाए । कमलामाइ नगरपालिकाका मेयर उपेन्द्र पोखरेलले शीत भण्डार र भुइँकटहर उद्योग स्थापनामा सहयोग गर्न राजदूत श्रीवास्तवलाई आग्रह गरेका थिए ।
प्रकाशित : माघ २१, २०७९ १७:५९
