महोत्तरीमा एकै दिन ९ हजार बालबालिकाले लगाए मोडर्ना खोप- मधेस - कान्तिपुर समाचार

महोत्तरीमा एकै दिन ९ हजार बालबालिकाले लगाए मोडर्ना खोप

सुनिता बराल

महोत्तरी — महोत्तरीमा एकै दिन ९ हजार बालबालिकाले कोभिड–१९ विरुद्धको मोडर्ना खोप लगाएका छन् । बुधबार सुरु भएको खोप अभियानको पहिलो दिन नै ९ हजार १ सय ४२ जनाले खोप लगाएको जिल्ला स्वास्थ्य कार्यालय महोत्तरीले जनाएको छ ।


महोत्तरीका ४६ वटा खोप केन्द्रबाट ४ हजार ३ सय बालक र ४ हजार ८ सय ४२ बालिकाले बुधबार मोडर्ना खोप लगाएको जिल्ला स्वास्थ्य कार्यालय महोत्तरीका खोप अधिकृत लक्ष्मेश्वर झाले जानकारी दिए ।

जिल्लाको स्वास्थ्य टोली खोप लिएर महोत्तरीका विभिन्न विद्यालयमै पुगेर खोप अभियान संचालन गरिरहेको झाले बताए । नियमित खोप संचालन गरिने केन्द्रहरूमा जान बालाबालिकालाई समस्या हुने भएकाले विद्यालयमै गएर बालबालिकालाई खोप लगाइएको स्वास्थ्यकर्मीले बताएका छन् ।

बर्दिवास नगरपाकिलाभित्रका विभिन्न सामुदायिक र निजी विद्यालयमा गएर खोप अभियान चलाउँदै एक दिनमै बर्दिवास नगरभित्रका मात्रै २ हजार ७ सय २८ बालबालिकाले खोप लगाएको स्वास्थ्यकर्मी रामबाबु यादवले बताए ।

हाल जिल्लाको उत्तरी क्षेत्रका बर्दिवास, गौशाला, भंगाहा, रामगोपालपुर, औरही नगरपालिका र सम्सी सोनामा गाउँपालिकामा खोप अभियान चलिरहेको छ । ११ गतेसम्म यी पालिकामा खोप अभियान चल्ने र १४ गतेदेखि जिल्लाका अन्य पालिका जलेश्वर,लोहारपट्टी, मनराशिसवा, मटीहानी, बलवा, पिपरा, महोत्तरी र एकडारामा १८ गतेसम्म खोप अभियान संचालन गरिने खोप अधिकृत झाले जानाकारी दिए ।

२०६१ मंसिरदेखि ०६६ मंसिरसम्म जन्मिएका १२ देखि १७ वर्षसम्मका बालबालिकाले यो खोप लगाइरहेका छन् । जिल्लामा ८५ हजार २ सय खोप उपलब्ध रहेको र अरु १२ हजार खोप अपुग हुने देखिएको खोप अधिकृत झाले बताए । बिहीबार पनि महोत्तरीका ४६ वटै खोपकेन्द्रबाट खोप अभियान चलिरहेको स्वास्थ्य कार्यालयले जनाएको छ ।

प्रकाशित : पुस ८, २०७८ १५:०३
प्रतिक्रिया
पठाउनुहोस्

तीन दिनदेखि हराइरहेकी महिला मृत फेला

सुनिता बराल

महोत्तरी — महोत्तरीको मटिहानी–३ की एक महिला हराएको ३ दिनपछि मृत भेटिएकी छन् ।

मटिहानी–३ बर्दाहा बस्ने फजेल राईनकी श्रीमती २२ वर्षीया रुक्साना खातुनलाई खोज्ने क्रममा मृत अवस्थामा फेला पारिएको जिल्ला प्रहरी कार्यालय महोत्तरीले जनाएको छ । खातुन पुस २ गते साँझ ५ बजे घरबाट हराएको भनि परिवारले धिरापुर प्रहरी चौकीमा खोजिदिन आग्रह गरेका थिए ।

खातुनलाई खोजी गर्ने क्रममा सोमबार दिउँसो मटिहानी–३ कै सार्वजनिक पोखरीमा मृत फेला पारिएको महोत्तरीका प्रहरी प्रवक्ता डिएसपी प्रकाश विष्टले जानकारी दिए ।

खातुनको शव पोष्टमार्टमका लागि जिल्ला अस्पताल जलेश्वर पठाइएको प्रहरीले जनाएको छ । खातुनको मृत्युको कारण खोज्दै घटनाबारे थप अनुसन्धान अघि बढाइएको डिएसपी विष्टले बताए ।

प्रकाशित : पुस ५, २०७८ १८:४९
पूरा पढ्नुहोस्
प्रतिक्रिया
पठाउनुहोस्
×