पासवान हत्या आरोपीमाथि अनुसन्धान थालियो- मधेस - कान्तिपुर समाचार

पासवान हत्या आरोपीमाथि अनुसन्धान थालियो

लक्ष्मी साह

बारा — बाराको जीतपुर सिमरा उपमहानरपालिका २० बसडीलवा गोठ टोलका २५ वर्षीय दीपक पासवानको हत्या आरोपमा पक्राउ परेकाहरुमाथि प्रहरीले अनुसन्धान थालेको छ । 

जेठ ३ गते हत्या गरिएका पासवानको शव ६ जेठमा भेटिएको थियो । उनको शव घरबाट पश्चिमतर्फ करिब ५ सय मिटरको दुरीमा रहेको कठोह खोला किनारमा बालुवाले पुरिएको अवस्थामा प्रहरीले फेला पारेको थियो ।

उनको हत्या आरोपमा प्रहरीले छिमेकी २ जनालाई पक्राउ गरेको थियो । जेठ ८ गते पक्राउ परेकाहरुलाई हिरासतमा राखेर अनुसन्धान गरिरहेको प्रहरीले जनाएको छ । बारा जिल्ला अदालतबाट ७ दिनको म्याद लिएर जिल्ला प्रहरी कार्यालय कलैयाको हिरासतमा राखेर अनुसन्धान थालिएको जिल्ला प्रहरी कार्यालयका एक प्रहरी अधिकृतले बताए । प्रहरी स्रोतका अनुसार पक्राउ परेका दुवैले पासवानको हत्यामा आफूहरु संलग्न रहेको स्वीकार गरिसकेका छन् ।

‘प्रहरी प्रतिवेदनको आधारमा घटनाबारे सुक्ष्म अनुसन्धान भइरहेको छ,’ ती प्रहरी अधिकृतले भने, ‘अनुसन्धानबाट संलग्नहरुको पहिचान भएपछि पीडितको तर्फबाट किटानी जाहेरी दर्ता भइ कानुनी प्रक्रिया अगाडि बढाइन्छ । कर्तव्य ज्यान मुद्दाअन्तर्गत अनुसन्धान भइरहेको छ ।’

मृतकका आमा सुनैनादेवीले प्रहरीले किटानी जाहेरी नलिएको बताइन् । ‘घटनामा २ जनामात्र संलग्न छैन्, अरु अरु पनि छ,’ उनले भनिन्, ‘हामीलाई इन्साफ चाहिएको छ ।’ छोरा दीपकलाई घरकै अगाडि उनीहरुले झै-झगडा गरी हत्या गरेर फालेको उनको दाबी छ ।


प्रकाशित : जेष्ठ १४, २०७९ २१:३२
प्रतिक्रिया
पठाउनुहोस्

सार्वजनिक संस्थानको नाफा ४५.४२ प्रतिशतले घट्यो

२२ नाफा र १९ संस्थान घाटामा
कान्तिपुर संवाददाता

काठमाडौँ — अघिल्लो आर्थिक वर्षको तुलनामा गत आर्थिक वर्षमा सार्वजनिक संस्थानको खुद नाफा घटेको छ । सरकारले शनिबार सार्वजनिक गरेको सार्वजनिक संस्थानको वार्षिक समीक्षा स्थिति २०७९ अनुसार आर्थिक वर्ष २०७६/७७  को तुलनामा सार्वजनिक संस्थानको खुद नाफामा ४५.४२ प्रतिशतले कमी आई आर्थिक वर्ष २०७७/७८ तुलनामा मा २६ अर्ब ३५ करोड ८८ लाख रुपैयाँ पुगेको छ ।

कुल सञ्चालन आय भने अघिल्लो वर्षको तुलनामा केही बढेको छ । अघिल्लो आर्थिक वर्ष कुल सञ्चालन आय ४ खर्ब २८ अर्ब ७१ करोड ३४ लाख रहेकोमा आर्थिक वर्ष २०७७/७८ मा १.५१ प्रतिशतले वृद्धि भई ४ खर्ब ३५ अर्ब १७ करोड ३९ लाख रुपैयाँ पुगेको छ । सार्वजनिक संस्थानहरुबाट गत आर्थिक वर्षमा जम्मा ६ अर्ब ७२ करोड १४ लाख लाभांश प्राप्त भएको छ । यो रकम अघिल्लो वर्षको तुलनामा ५२.३३ प्रतिशतले कम हो ।

आर्थिक वर्ष २०७७/७८ मा पनि विश्वव्यापीरूपमा फैलिएको कोभिङ–१९ को संक्रमण रोकथाम, नियन्त्रण र उपचारका लागि चालिएका कदमबाट समग्र अर्थतन्त्र नै प्रभावित हुन गएको अवस्थाका कारण सार्वजनिक संस्थानको कार्यसम्पादनमा समेत केही संकुचन आएता पनि सार्वजनिक संस्थानको समग्र वित्तीय स्थिति भने सन्तोषजनक रहेको सरकारले सार्वजनिक गरेको विवरणमा उल्लेख छ ।

आर्थिक वर्ष २०७७/७८ मा सञ्चित नाफा गत आर्थिक वर्षको तुलनामा ३.३५ प्रतिशतले वृद्धि भई १ खर्ब १३ अर्ब ५६ करोड ५९ लाख पुगेको जनाइएको छ । त्यसैगरी संस्थानहरुको सञ्चित नोक्सानी गत आर्थिक वर्षको तुलनामा ३६.३६ प्रतिशतले कमी आई २१ अर्ब ७८ करोड ६६ लाख रुपैयाँबराबर कायम भएको छ ।

हाल संचालनमा रहेकामध्ये २२ संस्थान नाफा र १९ संस्थानले घाटा व्यहोरेका छन् भने बाँकीको कारोबार शून्य रहेको देखिएको छ । हाल जनकपुर चुरोट कारखाना बन्द छ भने विद्युत् उत्पादन कम्पनी र राष्ट्रिय प्रसारण ग्रिड कम्पनीको व्यवसाय सुरुवाती अवस्थामा नै छन् । नोक्सानीमा संचालन भइरहेका संस्थानमध्ये नेपाल ओरियन्ड म्याग्नासाईट प्रा. लि., बुटवल धागो कारखानाको व्यावसायिक कारोबार भएको छैन भने नेपाल रेल्वे कम्पनीको व्यवसाय सञ्चालनको प्रक्रियामा छ ।

प्रकाशित : जेष्ठ १४, २०७९ २१:०४
पूरा पढ्नुहोस्
प्रतिक्रिया
पठाउनुहोस्
x
×